إلهام شاهين: مش مع إعادة إصدار الأفلام والمسلسلات القديمة

قالت الفنانة الهام شاهين سنة ٢٠٢٢ سنة مهمة جدا في حياتي، خاصة إني اتكرمت فيها بشكل كبير، في تونس والمغرب ومصر والعراق، واخدت جوايز عن مسلسل "بطلوع الروح" ٦ مرات، وكمان تم تكريمي في السينما عن دوري في فيلم "حظر تجول"، جاء ذلك خلال سهرة فنية خاصة بمناسبة رأس السنة والسهرة من تقديم أميرة نور على نغم اف ام.

وأضافت: حريصة جدا على انتقاء أعمالي وكسب ثقة جمهوري، ومش مهم حجم الدور، أو أكون موجودة كل سنة، وعن كواليس تحضير مسلسل "بطلوع الروح"... اتكلمت مع المخرجة كاملة أبوذكري عن إزاي أقوم بالدور ده وأنا ضد فكرهم المتطرف، فقالت لي إنتي هتطلعي كل هذا الكره في طاقة التقمص.

واخدت تدريب عشان أكون "أم جهاد" قائد لواء النساء.. كان لازم أكون متمكنة جدا وتواصلت مع وزارة الداخلية، واتمرنت على ضرب الرصاص الحي، والدور كان متعب جدا بالنسبة لي.

وعلقت: يارب نكون قدمنا رسالة مهمة وقد إيه إن الدواعش عالم أفاقين ومش بيدافعوا عن عقيدة ولا دين، وإنما هما ممولين من الخارج وبيغسلوا أدمغة الشباب.

واستكملت: انا بخاف من ربنا فقط، ومش بخاف من حد ولا شيء، وبتضايق جدا وانزعج من الكذاب والمنافق، وشخصيتي صريحة وعلى طبيعتي قوي، وتحت أي ظرف لا احب الكذب ولا النفاق.

وعن الرجل فقالت هو مهم في حياة كل امرأة، لكن حاليا مش موجود في حياتي، وأنا قوية ومعتزة بنفسي سواء كان موجود أو لأ.

وردها عن اعادة إصدار الأفلام أورالمسلسلات، فقالت انا مش مع أي إعادة إصدار لأفلام أو مسلسلات قديمة زي فيلم "العار"، وأول عملين فنيين في حياتي كانوا إعادة اصدار لأعمال فنية، وانا اراهم غير ناجحين.

إلهام الصغيرة روح العيلة واوجه لها نصيحة بلاش تسرع، كوني صادقة، واهتمي بشغلك، وأنا وإخواتي لازم نتقابل في ليلة رأس السنة ونقعد مع بعض.

أما عن الأعمال القادمة لسه مش واضحة لأنها لم يتم الانتهاء من كتابتها زي "اضطراب عاطفي" و "أمل حياتي"، وعندي فيلم اسمه "نسيم الحياة"، هدخل إيه بالظبط وأمتي لسه غير واضح بالنسبة لي، لكن أوعدكم سنة ٢٠٢٣ هتكون سنة فنية متميزة.

واختتمت قائلة سعيدة جدا بتكريمي في مهرجان الدراما المصرية، لأن وجود اسم النجم يحيي الفخراني على أي شيء في الدنيا ده مدعاة للثقة والاحترام، وهو أستاذنا وأنا بحبه جدا، وكنت فرحانة إني اتكرمت في الافتتاح.

واتمنى لكل المستمعين سنة تتصلح فيها أحوالنا بلا أوبئة، وكلنا نساعد بعض ونتمنى الخير لبعض، وبشكل شخصي بتمنى الصحة، ووجود الناس اللي بحبهم حواليا.

نرشح لك: جواهر: الأغنية اللي مابتتسمعش في الميكروباص ماتبقاش ناجحة