اعترافات مثيرة لقاتل مسجل خطر الطالبية والمحكمة تصدر الحكم

قررت محكمة جنايات الجيزة، معاقبة نقاش بالسجن المؤبد، لاتهامه بقتل مسجل خطر لخلافات بينهم بمنطقة بالطالبية.

وجاءت اعترافات المتهم كالآتي" أنا غلطان.. و اللى حصل كنت قاعد في البيت لقيت تامر ودنو واقف تحت البيت بينادي عليا وبيقولي انزل نقعد مع بعض شوية بس أنا عارف إني أول ما أنزل هو هيسحبني بعيد عن البيت علشان يفتشني في الفلوس اللي معايا علشان هو أكثر من مرة كان بيثبتني في الشارع لوحدي وساعات قدام زمايلي ويرفع عليا السلاح مرة كتر ومرة سكينة ويفتشني في الفلوس والتليفون وساعات كان يبى معايا سيجارتين اشربهم فيروح واخدهم فأنا قلت النهارده هعلم عليه علشان يبطل يعمل معايا كده فخدت كزلك من البيت وخبيته ونزلت واتمشيت معاه لحد ما وصلنا شارع البنك وراح مطلع كتر علشان يفتشني وقالي هات اللي معاك قلت له يا عم تامر ما احنا رايحين البيت عندك هناك هطلعلك اللي انت عايزة فراح مدخل الكتر تاني وأول ما لف وشه روحت مطلع الكزلك وضربه بيه في ظهره ضربة واحدة والكزلك غرز في جسمه وهو اللي طلعته من لبسي وراح واقع على الأرض وطلعت أنا على البيت جري وبعد كده الحكومة جت خدتني من البيت وده كل اللي حصل".

وأضاف المتهم:" الكلام ده حصل يوم 3 مايو 2022 حوالي الساعة 8.30 صباحا بشارع البنك بالكونيسة، وكنت ماشي مع المجني عليه تامر ودنو ورايحين على بيته، واللى كنت أعرفه إنه من المنطقة عندنا، ومفيش علاقة معاه قبل كده وهو كان دايما بيشوفني في الشارع في المنطقة عندنا ويقعد يفتشني في الفلوس والحاجة اللي معايا دايما تحت تهديد السلاح علشان هو عيل مسجل، وهو عمل معايا كده أكتر من 5 مرات، وبعد ما جه أخدني من البيت ومشينا مع بعض حاول يفتنشي في فلوسي ولما لف ضربته في ضهره من الناحية الشمال على غفلة ومحاولش يقاومني ووقع على الأرض ".

وأوضح المتهم:" أنا جبت السلاح من عندي في البيت، والمجني عليه طلع كتر وهددني علشان ياخد اللي معايا بس معورنيش ولا ضربني بيه، وأنا ضربته علشان كنت عايز اعلم عليه علشان يفتشني وياخد مني فلوسي وحاجتي، وأنا اتمشيت مع تامر على أساس أن احنا رايحين بيته وقلت أنا أعلم عليه في حتة بعيدة عن بيتي وبيته والدنيا كانت هادية في الشارع علشان الدنيا أجازة، وأنا كان عندي قضية سلاح أبيض وخدت حكم غيابي".