أول رد من فاروق فلوكس على دور صبي الراقصة

رد الفنان فاروق فلوكس، على من يقولون إن أموال التمثيل حرام.

قال فلوكس : "إيه الكلام الفارغ ده، اتقوا الله فلوس التمثيل التي يتحصل عليها الممثل لخدمة المجتمع حلال، ولكن غير كده مش حلال".

وأضاف فلوكس، خلال لقائه عبر فضائية "الحدث اليوم": "مرة كنت رايح حلوان، وكان في فرح معدي وشباب مسكين سلاح وسيوف، أنا قولت للسواق اركن لغاية لما يعدوا، والسواق قالي ده اللي بيشوفوه في التليفزيون".

وعن دوره في فيلم الراقصة والسياسي قال: "أنا عمري ما ندمت على حاجة لأن الفيلم حقق ليا فلوس وده رزق وربنا بعتلي الرزق أندم عليه! أما الدور في حد ذاته له رسالة إزاي معملوش، والدور ده محدش عمله بالجرأة دي".

كما هاجم الفنان أحمد فلوكس، زميله الفنان محمد رمضان بسبب سخرية الأخير من والده الفنان فاروق فلوكس لتجسيده دور "صبي رقاصة".

وتحدث محمد رمضان خلال لقائه الإعلامية نجوي إبراهيم المذاع على قناة النهار،: "فى فنان كبير عمل أشياء أرفض أن افعلها، وكان بيعمل أدوار صبي عالمة ولو هشحت مش هبقي زيه، رغم أن هذا الفنان قدير".

رد أحمد فلوكس

ليرد أحمد فلوكس ردّ فلوكس على تصريحات رمضان من خلال منشور عبر حسابه الشخصي في "فيس بوك"، كتب فيه: "شوف يا حماده، انت ترفض إنك تعمل دور صبي رقاصة لأنك دايماً نمبر وان، فأكيد هتبقى عينك على دور الرقاصة نفسها، مش الصبي بتاعها، وانت ما شاء الله ناجح في ده جداً وبتعمله سهل وانت عريان ما دريان".

وأضاف أحمد فلوكس: "نمبر وان بقى يا سيدي، زي بالظبط ما يكون واحد مسجل نشل، استحالة يحلم أن يكون أمين شرطة، حلمه هيكون أكبر من كده، هيكون نمبر وان".

وتابع موضحاً: "أنا والدي عمل دور صبي رقاصة لأنه بيعشق التمثيل والأدوار الصعبة، والحمد لله إنه ربى رجل بيحترم نفسه وبيحترم اللي بيقدمه للناس، وبيحترم بلده، ودمه فداء ليها، لأن شعب بلده هم اللي عملوه فلازم يقدملهم أحسن حاجة، وبحمد ربنا أكتر وأكتر، إن ما خلفش واحد مسجل نشل لأن المسجل هتكون أقصى طموحه أن يكون أسطورة، وهيرقص برضه بس عريان".

واختتم أحمد فلوكس هجومه قائلاً: "وبعدين مش شرط تعمل دور صبي رقاصة، ممكن تكون نجم كبير بس أخلاقك أخلاق صبي الرقاصة، وده الأخطر مع إن والله صبي الرقاصة ولا بيقهر حد ولا بيظلم حد، ولا ليه في سكك الشيوخ والدجل، ولا نصاب ولا بيحكها مع الكبار".