أسرار وتفاصيل ترويها أنغام لأول مرة في صالون برنامج سهرانين

حلت النجمة أنغام ضيفة في برنامج "سهرانين" تقديم النجم والإعلامى أمير كرارة، والذي يذاع على قناة ON، وقامت انغام بالتحدث من خلال الحلقة عن بدايتها مع الغناء، قائلة: "بدأت أعزف بيانو من تالتة ابتدائى، وده سن كويس لأن الطفل وهو صغير تعليمه بيكون أسهل من الكبير".

وتابعت أنغام حديثها : "غنيت في أول حفلة ليا كمطربة محترفة كان عندى 17 سنة في حفلة تبع الإذاعة كانوا بيسموها حفلة الأم والربيع، وغنيت فيها اغنية للأم وهى الأغنية اللى اعتمدونى فيها في الإذاعة".

وأضافت أنغام: "أنا كنت عضو فى كورال الأطفال الكونسرفتوار، وكانت بروفاتنا على مسرح سيد درويش ومكنتش وقتها بخاف لأن الطفل مش بيكون فاهم، ولكن حاليا وأنا كبيرة بخاف وأنا طالعة على المسرح ولو مسكت إيدى هتلاقيها متلجة لأن لما بتكبر بتحس بالمسئولية أكتر، وببدأ أخد على الأجواء بعد شوية قدام الجمهور".

وتحدثت ايضا عن مطربتها المفضلة قالت أنغام: "فيروز أول حب بالنسبة ليا أغنى ليها لأنى من طفولتى وأنا متأثرة جدا بيها، وكانت نجمتى المفضلة، وهى عملت حفلة زمان في مصر كانت بتتذاع في التليفزيون المصرى، ولما تشوفها على المسرح عندها حضور غير عادى وصوتها غير عادى بجد".

وأستكملت أنغام: "كنت ساكنة في مدينة نصر في فترة الطفولة وكنت بلعب مع حد بقى نجم كبير جدا وهو الفنان محمد حماقى، وتجمعنى بيه صداقة قوية، حتى إنى واخدة منه أغنية بين البينين من ألحانه، وفى الحقيقة أنا سطوت على الأغنية لأنى سمعتها عند أمير طعيمة بصوته وقلتله أنا عوزاها وحماقى ادهانى هدية ومرضيش ياخد فلوس".