عبدالله رشدي مهاجمًا إسلام بحيري: غِلُّك من الإسلام معروفًا للجميع

رد الداعية الإسلامى الدكتور عبد الله رشدي، اليوم الجمعة، على الباحث إسلام البحيرى، وذلك بعد هجوم الأخير على المسلمين ووصف تاريخهم بأنه دموي وأنَّ حضارتَهم زائفةٌ وعلماءَهم كَهَنَةٌ وفتوحاتِهم اغتصابٌ واحتلال، وذلك عبر حسابه على الفيس بوك .

وعلى ضوء ذلك قال عبد الله رشدى، أن الأخ المحبوس-سابقاً-بأمر العدالةِ بيصف كل حكام المسلمين بالدموية والقتل والتخريب، وأن كمية الغل اللي جواه هو وأمثاله من الحضارة الإسلامية والتاريخ الإسلامي لا توصف، والغرض في النهاية إنه يوصلك لمرحلة الانهزام النفسي، فحضارتك وحكامك كلهم قتلة، ودينك لم ينجح في إنه يخرج أمة ولا حضارة واعية، وباختصار إنت كمسلم حلك الوحيد إنك تعتذر للعالم كله!

وأضاف"عبد الله رشدي" فى تصريح خاص لـ"بلدنا اليوم" أنه في وقت كان الأوروبيين فيه بيبعتوا ولادهم يتعلموا الطب والفلك والهندسة والمنطق في عواصم البلدان الإسلامية، في وقت كان الرخاء وانتشار المعرفة جعل أبناء الملوك في أوروبا يتعلموا عندنا ويتوسلوا لدى حكامنا إنهم يستضيفوا ولادهم يتعلموا، جاء اليوم اللي واحد زيك عايز يمسح كل دا بجرة كيبورد على فيسبوك! إنتو متخيلين كمية الغسيل المعرفي اللي بيتعمل لينا من دول وإزاي بيكرسوا كل جهدهم ويستغلوا المواقف المشتعلة ويدسوا السم في العسل!

وأكد عبد الله رشدى "أن تاريخنا مشرف والخلافة اللي تاعباك دي ملهاش دعوة بالواقع السياسي، باختصار لأن لا الخلفاء كانوا إخوان لأن مكنش وقتها في إخوان، دول بعد انتهاء الخلافة أصلاً، ولا أردوغان خليفة، دا حاكم زيه زي أي حاكم بيخطأ، وملوش لا عصمة ولا قداسة والحق فوقه وفوق الجميع ويتحاسب على أخطائة، وحكمه علماني ملوش علاقة بالدين، فبلاش مزايدات رقيعة".

وتابع الداعية الإسلامي : "إن اصطيادك في الماء العكر معروف، دايماً تستغل الأحداث لزرع بغض جوا الناس لدينها أو تاريخها أو حضارتها عايز توصل المسلمين لمنطقة إن كل تاريخكم سي ومُشين، وغِلَّك باين منك، بس معلش المسلمين فاهمين اللي زيك..والقضاء أدبك قبل كدا وعرفك قيمتك الفكرية".

ووجه"الداعية الأسلامى" سؤالاً للباحث ؟ عارف مشكلتك واللي زيك فين؟

في المكان دا #الأزهر ، لأنه واقف ضد محاولاتكم المستميتة للعبث بدين المسلمين وحضارتِهم، ورافض مشاريعكم الوهمية بتاعة التنوير والدين الجديد اللي نفسكم تمرروه لينا، بس معلش شعبنا بيحب الأزهر، ورئيسنا ودولتنا وقضائنا وكل مؤسساتنا بتحب الدين والأزهر اللي حمل الأمانة دي جيلاً عن جيل...والأزهر كان ديماً بيت الوطنية المصري..الأزهر اللي أئمته طول عمرهم وعلماؤه كانوا ضد المحتل والصهيوني وإيديهم في إيد الوطن..فمعلش.

#الأزهر_قادم