أحمد أمين عن حالته الصحية: "هرجع اشتغل قريب جدًا"

نشر الفنان أحمد أمين عبر صفحته الرسمية على موقع التواصل الإجتماعي "فيس بوك" تطورات حالته الصحية، طمأن فيها معجبيه ومحبيه بعد الأزمة الأخيرة التي تعرض لها.

وكتب "أمين" في منشور قائلًا: "أنا الحمد لله بقيت أحسن كتير.. وهارجع اشتغل قريب جدا.. وباخد دلوقتي جلسات voice therapy دي حاجة لطيفة جدا واكتشفت انها ضرورية ومفيدة لكل اللي بيستخدم صوته كتير (ممثل – مغني – مدرس - .....) بس مش ده المهم.. المهم هو اني استفدت كتير جدا من تجربة الصمت.. أسبوعين منغير كلام فرقو معايا جدا ذهنياً.. وينفع يتكتب فيها كتب بس سريعا كده".

وتابع أحمد أمين عن حالته الصحية وتطوراتها: "أولا لقيت نفسي عايز اكتب زي زمان مش عشان عندي كبت، لأ.. عشان المخزون بيزيد، ما هو لما بتقلل وقت الارسال وقت الاستقبال بيزيد، أنا بقيت بسمع، قريت كتير حتى حاجات متعلقة عالحيطة في المكتب والبيت من زمان قدام عيني وماكنتش قريتها.. وتقريبا قربت اسمع الحاجات كمان قربت اسمع الزرعة اللي عندي في المطبخ، وكنت بتواصل مع الناس بالكتابة واحتفظت بشوية ورق منه لقيت الكلام ورا بعضه في سياق مسخرة مش مفهوم بالمرة.. أما الورقة اللي كنت بكلم فيها مراتي لقيت فيها 3 جمل بس (ياااه...؟ / ما هي غلسة وتستاهل/ وحاضر يا حبيبتي) بس وبيتكرروا".

وأضاف خلال منشوره: "كنت بشاور لأولادي وفهموني، وما اضطريتش ازعق في البيت، والدنيا كانت ماشية معناه ان لو القانون ان بابا مش بيزعق هايترتب على القانون ده ان كلنا هانسمع الكلام منغير زعيق، الصمت محتاج صبر، وعدم التعبير بالكلام محتاج بلاغة مش في انك تعرف تشاور لا محتاج بلاغة في اختيار الكلمة اللي هاتشاور بيها عشان تلخص كل كلامك والناس تفهم".

جدير بالذكر أن أحمد أمين كاتب وممثل وله العديد من المواهب، كانت شهرته من خلال برنامج البلاتوه الذي عُرض على فضائية النهار، وحقق نجاحًا كبيرًا، وتوالت أعماله.