حل الفنان كمال أبو رية، ضيفا في برنامج "كلام الناي" الذي تقدمه الإعلامية ياسمين عز، على قناة mbc مصر.
ويقدم لك "بلدنا اليوم" أبرز تصريحات كمال أبورية، خلال الحلقة، التي تسببت في تصدره محركات البحث العالمي "جوجل".
- في الفترة الأخيرة حسيت إني كبرت، والذكر حلو، والمفروض نفتكر ربنا ونشكره، نسبحه وندعي إنه يعفو عنا ويعافينا، ويحافظ على أولادنا، كل مرحلة سنية وليها ظروفها.
- استايل حياتي متوازن، مش باكل كتير، باكل حاجات كويسة أكل صحي، وأنا متربي في قرية بدمياط وكنت باكل سمك كتير، ولسه محافظ على هذه العادة، وأحيانًا بمارس الرياضة بس مش كتير.
- فيفي عبده لها كل الاحترام والتقدير، أنا بحبها جدًا، ست ذوق وعندها كاريزما وحضور ودمها خفيف ومعاملتها حلوة، وبتحب الناس.
- الدور اللي أنا عملته كان ممكن يكون مناسب لحد تاني، أو دورها ممكن يكون مناسب لحد تاني، الموضوع عمل ضجة، لكن فيفي عبده ممثلة كويسة بس الدور ما يناسبهاش، وأنا يمكن برده عملت دور ما يناسبنيش.
- الموضوع سهل وبسيط، إحنا مكناش كاستيج، لا كان الدور ينفعها ولا الدور ينفعني، ولظروف المنتج جمعنا مع بعض، وكان في عدم توفيق.
- نرمين الفقي أخت وصديقة وزميلة عزيزة، وإحنا أصدقاء من زمان واشتغلنا مع بعض كتير، وإحنا جيران فعلا، وأنا يمكن ترددت في بعض المناسبات كتير يعني، فهم شافوا اننا متجوزين، يعني في ناس تقابلني تقولي يعني دي إشاعة يا أستاذ كمال، فاقوله آه، فيقولي يا خسارة.
- قالوا كده كتير، هو أصل السوشيال بيكون معندهمش لا قرائن ولا دلائل، يعني أنا هتجوز نرمين الفقي، طيب معملناش فرح؟، طب معملناش حفلة صغيرة كده طيب؟.
- في ناس واخدة كل حاجة على قلبها، وتاعبة نفسها قوي، يعني لو معندوش شغل مينمش ويقعد يجري ويقابل الناس، ويشتكي، أنا مش شكاي وبقدر أستوعب الأمور، فيمكن ده السبب إني مش باين عليا السن، بس أنا شايف نفسي كبرت يمكن الناس مش شايفين كده، بس أنا شايف نفسي كبرت.
- أنا حياتي سهلة وبسيطة، ومش حاسس إنني أنا كبير، وبحاول أحب الحياة وأعيش على التفاؤل، لكن لا يمكن تجاهل السن وتغييراته على الإنسان جسديًا، البني آدم له مراحل لازم يمر بيها.
- أول ما شوفتك يا ياسمين قولت عليكي حلوة بس لئيمة.
- طبيعة المرأة المصرية أن تهتم بشؤون أولادها على حساب زوجها، هي ست تعشق التضحية وتتفانى في واجبها تجاه أولادها لكنها في المقابل تهمل نفسها وتنسى حقوق زوجها، وعلى أثر كل ذلك تحدث المشاكل الزوجية العنيفة.
- على المرأة المصرية التوفيق بين كل هذه الواجبات، أقصد أن ترعى شؤون أولادها وتهتم بزوجها، وتجعله شريكا معها في تربية الأولاد.
- أرفض التعدد، إلا إذا كان الرجل لديه دوافع قوية للزواج الثاني، وخوض تجربة جديدة.
- مش بزعل من إفيه متبقاش طيب زي كمال أبورية، على العكس بفرح بيه، لأن طيبة القلب والرحمة والتسامح والذوق والتواضع من شيم الرجال، ومن شيم الرسول عليه الصلاة والسلام.
- اللي يستغلني يستغلني، ربنا موجود وبيعوض، أنا في حياتي ممكن أكون خسرت شوية حاجات، ماديات مثلًا، وبعدين في فرق بين السذاجة وبين الطيبة، أنا مش ساذج علشان يضحك عليا بسهولة.
- أقدر أعيش من غير الست وجربت ولقتني مرتاح، ليا صديقة في حياتي بدردش معاها وباخد رأيها وأحيانا الأصدقاء بيكونوا أكثر شفافية من القريبين زي الزوجة كدة.
- لو الست مهملة في حق زوجها المفروض يستوعبها ويكسر الحاجز ده مثلا أنه يروح يتفسح ويرجعلها تاني.
- الـ 10 سنين اللي فاتوا حصل فيهم تحول في مسار الدراما في مصر، قبل كدة كان عندنا الوعي الكافي انه يكون في استقرار لمجتمعنا، قبل 25 يناير كان فيه ارهاصات انه فيه فوضى، فظهرت أعمال درامية بتعود الناس والشارع المصري على انه لو حصل فوضى ده شيء عادي رغم ان وظيفة الفن بيساهم في استقرار المجتمع، وإحنا مش بنشتغل في الحاجات دي، وهمشوا مؤلفين كتير وقعدوهم في البيت وبقى فيه شباب جدد وهما عايزين يشتغلوا فبيكتبوا اللي هما عايزينه، وبدأت أدورنا تتنقل لـ مرحلة تانية فمبقتش بطولة.
- عمر ما أحمد عبد العزيز ما كان عايز يعلي عليا، وأنا بيني وبين أحمد عبد العزيز احترام متبادل بدرجة عالية، أنا بحترم موهبته وهو كذلك وأنا وهو مدرستين مختلفتين في الأداء، وهو عمره ما عاد مشهد عشان يقللني ويبقى أحسن، وهو راجل أكاديمي عايز يكون كويس وخلاص مش أحسن من حد، والتنافس بينا كان شريف وكنا مع بعض في المداح.
- قولت لإبني متشتغلش المهن دي عشان متهنش نفسك، وهو ادائه حلو وطلع حاجة لطيفة وان شاءالله ربنا يكرمه، الفن مفهوش واسطة وابني هيكون شبهي في الأداء ووالدته ممثلة شاطرة جدا ، وهو بيفكر بطريقتي وهيمثل بالطريقة دي وواعي لهو هيعمل اي، مفيش حاجة اسمها تقمص في الشخصية، لكن فيه حاجة اسمها تعايش لدرجة الست.
تابعوا أخبار بلدنا اليوم على Google News
