انتقد الإعلامي عمرو أديب، الدكتور رضا حجازي، وزير التربية والتعليم والتعليم الفني، بعد قراراته الأخيرة بشأن تقنين السناتر والتعاقد مع شركة خاصة لإدارة مجموعات التقوية.
ووجه أديب سؤالا لـوزير التربية والتعليم والتعليم الفني، خلال تقديم برنامجه "الحكاية" المذاع على قناة "إم بي سي مصر"، قائلا: "بما إنه الطلبة هتروح السناتر ومجموعات التقوية، أنتم فاتحين المدارس ليه؟".
وأضاف "إنت بتقول لي يا جماعة مجموعات التقوية دي مهمة جدا، جايبين لها شركة، والسناتر أنا باقننها، بعد كده إمبراطور الكيمياء وإمبراطور الفيزياء اللي كان بيعمل 2 و3 مليون جنيه في الشهر لأ هنخش معاه شركاء، وناخد جزء من الفلوس دي".
وانهال عمرو أديب بأسئلة: "طب أنتم مخليين المدارس ليه؟ وأبنية تعليمية والوزارة والمدرسين رايحين والمدرسين جايين.. وامتحانات المدرسين والحق السبورة. طب ما تقفلوها.. إنت عاوز المدرسة في حاجة؟ مصاريف ع الفاضي؟ خلي كل المدرسين تدي دروس خصوصية، ويشتغلوا في سناتر".
وعقب: "أنا عايز اسأل وزير التربية والتعليم سؤال: هل اللي اتعمل ده دستوري؟ طيب الطالب ودول الأغلبية اللي معهوش يدفع تقوية ولا يدفع سناتر يتعلم إيه ويروح فين؟! ما هي اتقسمت في البهوات بتوع السناتر، وفي الأقل شوية بتوع التقوية".
وتابع "تحس إن الوزير ده عامل أوكازيون للتعليم.. ده حتى واصل لمرحلة والغياب يبقى بفلوس، يعني لو عاوز تغيب ارمي لهم 500 أو 600 جنيه، وما تروحش المدرسة".
واختتم بسؤال "هو ده تطوير التعليم اللي انتم عاوزينه؟".
تابعوا أخبار بلدنا اليوم على Google News
