بيومي فؤاد لراديو هيتس: بنزيني في رحلتي هو الصبر وأحلي كواليس مع المخرج معتز التوني

قال الفنان بيومي فؤاد أنا خريج كلية " فنون جميلة " سنة "1990 " ، و دخلت مركز الإبداع الفني من سنة 2003 إلى 2006، واشتغلت على مسرح الدولة، وبدأت أتعرف عند المخرجين الكبار زي محمد ياسين، شريف عرفة، كاملة أبو ذكري، جاء ذلك خلال حواره لبرنامج ع اللوكيشن مع شريف الليثي علي راديو هيتس.

و أضاف بدأت مصر تعرف مين هو بيومي فؤاد سنة 2013 في مسلسل "الكبير أوي"، و بحب أعمل اللي بحبه، واللي الناس بتحب تروح له، ولو فضلت طول عمري أعمل دور تاني أو تالت هكون مبسوط .

وعن كل اللي بتمناه إني في السنة الواحدة أعمل تنوع في الدراما، و كنت بعمل أكتر من مسرحية في وقت واحد، و بنزيني في رحلتي هو "الصبر".. أنا شخص صبور جدًا.

وأما اللي وقف جنبي من بدايتي هو ربنا سبحانه وتعالى، وإخواتي دايما في ضهري وبيدعموني، واللي بيدعمني من الوسط الفني أحمد فتحي ومحمد ثروت وكل شباب مسرح مصر.

وعن نقطة التحول ليا كانت في أفلام "كابتن مصر"، "جحيم في الهند"، "الحرب العالمية الثالثة"، و أكتر عمل ليا بحبه فيلم "حملة فريزر" ، و مسلسليّ "موجة حارة"، و"خيانة عهد" كانا نقلة مهمة في حياتي، و أكتر مخرج كوميدي بحب أشتغل معاه معتز التوني وأحمد الجندي.

واختتم قائلا أجمل كواليس ممكن تشوفها في حياتك مع المخرج معتز التوني، و بحب أشتغل مع الأستاذ شريف عرفة ومحمد ياسين، و أكتر ممثل نفسي أشتغل معاه الدكتور يحيي الفخراني.