منى زكي تشارك في اليوم العالمي للقضاء على ختان الإناث

شاركت النجمة المصرية منى زكي في فعاليات اليوم العالمي للقضاء على ختان البنات، فقامت بنشر صورة على صفحتها الرسمية على موقع الانستجرام الخاص بها.

وعلقت على الصورة ببعض الكلمات لتوعية الكل ولات انتباههم لخطورة ختان البنات قالت: "مفيش أم تقبل على بنتها حاجة تضرها، بس في أمهات لحد دلوقتي مش مدركين قد إيه جريمة بشعة زي "ختان البنات" بتيجي على كرامة وصحة وحياة بناتهم، ختان البنات مش عفة ولا أي حاجة من الكلام ده، وللأسف في أهالي كتير فاكرين أنهم أما يعملوا "ختان طبي" لبناتهم يبقي كدا عملوا اللي عليهم".

تابعت: "انتي أكتر واحدة عارفة مصلحة بنتك وأكتر واحدة تحميها من جريمة ميقبلهاش عقل ولا طب ولا دين ولا قانون".

أضافت: "أنهاردة اليوم العالمي للقضاء على ختان البنات وأنا كسفيرة لليونيسيف حابة أوعي الناس للقضية دي، وخصوصًا إن في ناس كتير متعرفش إن في جهة حكومية اسمها الجهة الطبية للقضاء على ختان الإناث بقيادة المجلس القومي للمرأة والمجلس القومي للطفولة للتوعية بأضرار ختان البنات".

اختتمت كلامها: "لو عاوزة تستفسري أكتر أو محتاجة مساعدة عشان تحمي نفسك أو بنتك أو أي بنت تانية من الختان، كلمي نجدة الطفل 16000، أو خط المرأة 15115، وربنا يحمي كل البنات".