زوجة تامر عاشور:" هنتفق على الطلاق خلال الفترة المقبلة"

نشرت سمر أبو شقة زوجة الفنان تامر عاشور، على "إنستجرام"، صورة تعبيرية لزوج وزوجة وطفلهما، كتبت بجوارها: "أنا وتامر هنفضل نحترم بعض لأن فى بينا عشرة وبنتنا أيام، اللى هتفضل رابط بينا طول العمر، واللى أهم ليا إنها إن شاء الله تكبر متلاقيش أى حاجة تضايقها و تلاقى كل هدوء".

وأضافت: "الموضوع لا ترند ولا شو ولا أى حاجة غير حقيقية، وحاجة بتحصل كل يوم بس بيحصل اللى حاصل لما يبقى حد مشهور، احنا آه منفصلين (مش مطلقين) (ولا اطلقنا)".

وأوضحت سمر أبو شقة: "مرينا بمشاكل زى أى ناس طبيعية، اتفقنا أو اختلفنا بتحصل يعنى و بغض النظر عن مين غلط ف حق مين و ازاى.. ولكن مهما حصل مفيش حد هيقبل أن يحصل تجريح للتانى فى اللى جاى".

وأكدت زوجة تامر عاشورـ أخبار انفصالهما، قائلة: "المفروض نتفق بكل هدوء على الطلاق خلال الفترة المقبلة.

وتابعت: "اللى اكيد بعد مايحصل مش هينقص من احترامى ليه او احترامه ليا وهنفضل اصدقاء تجمعنا " أيام" اللى هتفضل اهم من اى حد و اى حدث، بس نبقى بنتجنب الضغوطات والمشاكل اللى ايا كان سببها موجود او انتهى بلا رجعة، اتمنى الموضوع يتقفل و مشوفش اى حاجة تضايقني، واللى بيحبونى دعوة حلوة و شكرا لكل الحب و الدعم اللى بشوفه".

وكانت سمر أبو شقة، قد كشفت عن طلبها للطلاق من زوجها من خلال عدة أسئلة طرحها عليها متابعيها، عبر إنستجرام، وردت أبو شقة على هذه الأسئلة بإجابات متشابهة وهى إصرارها على الطلاق، لأن الحياة الزوجية عشرة وتفاهم وليست صورًا تُنشر عبر السوشيال ميديا، موضحة أنها شعرت بالخيانة بعد إعلان تامر عاشور خطبته على دارين حلمى وهى لا تزال على ذمته.

ولفتت إلى أن الحب من الممكن أن ينهيه موقف واحد بين الطرفين، كاشفة أنها تحاول الطلاق منذ أكثر من عام ولكنها لم تستطع الحصول عليه.