السبب مش إصابتك.. أمير مرتضي يرد على تساؤلات جنش

وجه أمير مرتضي منصور، المشرف العام على كرة القدم بنادي الزمالك، رسالة لحارس مرمى الفريق محمود جنش بسبب حديثه عن عدم حصوله على مقدم عقده مع النادي.

ونشر أمير مرتضي عبر حسابه الرسمي بموقع التواصل الإجتماعي إنستجرام، رسالة طويلة تحمل ردا على تساؤل جنش قائلا:"أحب أرد عليك قدام الناس علشان حقك وحقهم يعرفوا لأنك سألتني قبل كده ورديت عليك بيني وبينك لما جيتلك البيت، ورغم أن نظام الفريق منع الكلام في الإعلام والسوشيال ميديا بس هرد عليك".

وأكمل: "لا السبب مش إصابتك طبعًا يا كابتن.. تقدر تسأل كل زمايلك في الفريق على مقدم الموسم الجديد حصلوا عليه ولا لأ !! جميع اللاعبين باستثناء أتنين لاعيبة فقط هما اللي حصلوا على المقدم علشان كان عندهم ظروف طارئة يعني مثلًا فرجاني وبو طيب طارق حامد ومحمود علاء والونش ومحمد حسن زيزو وعمر السعيد وعبدالله جمعة وأوباما وغيرهم لسة مخدوش مقدم الموسم الجديد".

وأضاف: "أما بالنسبة للصفقات الجديدة فالطبيعي أن يقبض المقدم مع التوقيع وفي برضه ناس لسة مقبضتش وقالو مفيش مشكلة نقبض مع زمايلنا بما أنك سألت عن السبب قدام الناس فأحب اقولك أن الشركة الراعية متأخرة في دفع مستحقات كل الأندية حتى المقاصة كانت مش هتذيع الماتش بسبب مستحقاتهم".

وتابع: "تقدر برضه تسأل زمايلك في اندية ثانية باستثناء بيراميدز.. عقود الرعاية والبث التليفزيوني هي ٩٠٪؜ من موارد النادي.. كان ممكن نبيع طارق حامد أو محمود علاء أو فرجاني وندخل فلوس كتير للنادي وساعتها مكانش هيكون في أزمة سيولة بس ده كان ضد مصلحة الفريق، كان ممكن منشتريش عواد وابو جبل واوناجم وبن شرقي بالمبالغ دي ونجيب بدايل ارخص ونوفر برضه فلوس".

واختتم رسالته قائلا: "بالإضافة لمديونيات اكتر من ٥ مليون دولار على الزمالك اتدفعوا كلهم السنة دي ومشكلات مع الـ«فيفا» عقوبتها خصم نقاط ووقف شراء وبيع لاعيبة لمدة ٣ مواسم في حالة عدم السداد واخرها كان من يومين.. عالعموم انت من كباتن الفريق والمفترض انك تستحمل زي ما زمايلك مستحملين ايه المشكلة فلوس تتأخر كام يوم!! زي ما الموسم اللي فات كنتوا بتاخدوا ٤ و٥ اضعاف المكافأت...بتمنالك الشفاء".

يذكر أن جنش قد نشر أيضا بوست صباح اليوم على صفحته الرسمية عبر موقع التواصل إنستجرام: "أتقدم بخالص الشكر والتقدير إلى الاتحاد المصرى لتحمل كافة تكاليف علاجي حتى الآن وأشكر جمهور نادي الزمالك العظيم على مشاعركم ومساعدتى في تخطى الأزمة والعودة للملعب وأؤكد لم أحصل على مقدم تعاقدي من نادي الزمالك حتى الآن لا أعرف السبب هل بسبب إصابتي؟ أو شيء آخر".