بعد وفاته.. صلاح عبد الله يسترجع ذكرياته مع أبو الوفا

نعى الفنان صلاح عبد الله، على حسابه الشخصي علي موقع توصل الأجتماعي الشهير "فيسبوك"، الفنان محمد أبو الوفا، والذي رحل صباح اليوم بعد صراع مع المرض.

وعلق صلاح عبد الله قائلاً: "محمد أبوالوفا عارف يامحمد أنا النهارده صحيت مالنوم الساعة ٣م وأول حاجة قلتها الحمدلله أخيراً نمت كويس والورم في رجلي فش كتير وحاسس إني إتحسنت صحياً بفضله وكرمه ومقبل عالحياة بإبتسامة جوانية عريضة ولذيذة وعاقد العزم على مواصلة دعم منتخب بلدي في مواقع التواصل وفعلاً بعد الإجراءات العلاجية المعتادة يومياً فتحت الفيسبوك وأول حاجة شفتها صورتك يامحمد.

وتابع صلاح عبد الله قائلاً: "فاكر يامحمد المرة الوحيدة اللي قعدت فيها معاك قعدة طويلة أثناء التحضير لمشهد يجمعنا في عائلة الحاج نعمان وكل ماتقولي ياأستاذ أقولك ماتقوليش ياأستاذ لإن إنت الأستاذ ووقفت في الأستوديو وقلت بعلو الصوت ياجماعة أنا ليا الشرف والفخر إني همثل دلوقتي قصاد الأستاذ محمد أبوالوفا".

وواصل صلاح عبد الله : "عارف يامحمد أول مرة شفتك في التليفزيون قعدت أقول لنفسي مين الراجل دا وكان فين الراجل دا وإزاي بيمثل بالحلاوة والبساطة وبالشكل دا الراجل دا وكل مرة كنت بقول نفس الكلام وأنا قاعد قصادك زي التلميذ ياأستاذ، وفاكر يامحمد لما قلتلك إنت كنت فين ياجدع إنت وإزاي وليه دانت المفروض تكون في حتة أكبر بكتير ماللي إنت فيها إسماً وأجراً وشهرة في حتة أكبر كتير ماللي إحنا فيها أو بالتحديد ماللي أنا وصلت ليها وترد بضحكة عسل مالهاش زي بترن دلوقتي جوايا وإنت بتقولي بطل تواضع ياأستاذ وأقولك ناني ماتقوليش ياأستاذ ودا مش تواضع والله دا إقرار بالحقيقة والله إقرار وإعتراف بالحقيقة يا محمد يابوالوفا".

واختتم صلاح عبد الله قائلاً: "عارف يامحمد والله العظيم أنا مش عارف ليه كتبت كل الكلام دا في نعيك إنت بالذات ومش عارف ليه لغاية دلوقتي مش قادر أبطل عياط مع إني ماعرفش عنك غير إنك ممثل عظيم ظهر متأخرا ورحل مبكراً وشفت في عينيه لما قعدت وياه إن الدنيا دي مش فارقة معاه ولإني بدأت أتعب يابوالوفا هختم برسالة ليك ياأستاذ فاكر يامحمد لما قلتلك إنت المفروض تكون في حتة أحسن كتير أهو إنت دلوقتي ياحبيبي في الحتة الأحسن والأفضل والأجمل والأنضف والأبقى والأحلى والأعلى بإذن الله ورعايته ورحمته وفضله وكرمه أسأكم الفاتحة والدعاء للأستاذ محمد أبوالوفا".

ويذكر أن أخر أعمال أبو الوفا مسلسل "بركة" في رمضان الماضي، من بطولة النجم عمرو سعد، وهالة صدقى، وكمال أبو رية، وإخراج طارق رفعت، وتأليف محمد الشواف.