خالد عليش يعلن انسحابه عن ”إف إم” وتوقف ”الهلي” و”معاك في السكة”

أعلن المذيع والممثل خالد عليش عن عدم تواجده ضمن فريق محطة نجوم أف إم في عام ٢٠١٩.

وكتب "عليش" عبر حسابه الخاص بموقع التواصل الاجتماعي "فيسبوك": "لكل اللي بيسأل واللي مهتم واللي مش مهتم انا ليه مش في نجوم إف إم السنة دي"، موسيقي أيام السادات في الخلفية"، للأسف و ببالغ الحزن والأسي مش هاكون ضمن فريق نجوم إف إم السنة دي يعني مفيش معاك في السكة، ولا موقف، ولا هلي في ٢٠١٩".

وأوضح "عليش": "أسباب كتير هي السبب في القرار ده منها الميعاد الصعب جدا وخصوصا إني بشتغل حاجات تانية منها إني بمثل وغيره، بس اللي يعرفني كويس في الشغل يعرف إني بحب التجديد دايما ومحبش أقف عند مرحلة معينة من النجاح و خلاص.. نجاحي في نجوم إف إم مكانش معتمد عليا أنا بس، بالعكس أنا كنت جزء صغير جدا من منظومة اتشرفت إني اشتغلت معاهم من أصغر شخص لأكبر شخص، ولآخر لحظة علاقتنا زي الفل يعني مش ماشي بمشكلة ولا حصلت خناقة عشان الإشاعات المغرضة، وكان من أهم أحلامي اللي عافرت كتير عشان أوصله إني اشتغل مذيع في نجوم إف إم".

وأضاف "أنا سايبلكم خالد جواد مكاني عشان الوحيد اللي لقيته اسمه خالد ربنا معاه إن شاء الله ونجوم إف إم كلها في ضهره "موسيقي حزينة في الخلفية" أنا أسف لكل اللي اتعودوا يروحوا علي البرنامج ولكل اللي مزاجه بيظبط مع الهلي، بس هي سنة الحياة التغيير.. مش عايز حد يزعل و عايزيكم تقفوا معايا في خطواتي اللي جاية وبلاش عبارات ليه يامعلم تعمل كده ده انتا كنت مكسر الدنيا ولا بصات الشفقة عشان أنا فيا اللي مكفيني"موسيقي فرحة في الخلفية"،  انتظرو تفاصيل أكتر عن المشروع الإذاعي القادم في الأيام الجاية".