سيدة تصرخ أمام محكمة الأسرة: "زوجي بيخوني مع أختي"

أصبحت قضايا الخلع منتشرة بشكل كبير خلال الفترة الراهنة، وتعددت أسبابها ما بين الخيانة والإدمان والكذب والعادات السيئة، وكذلك المبررات الغريبة وغير المنطقية، ما يدفع أحد الطرفين لإنهاء العلاقة الزوجية لعدم قدرته على تحمل ذلك.

 وقفت سيدة تدعي "سهير.أ" أمام محكمة الأسرة قائلة: "كارثة وصدمة عمري في أختي أكتر من جوزي لما عرفت أنهم على علاقة غير شرعية، وكمان هو بيروح لها شقتها وبقالهم أكتر من 6 شهور بيمارسوا الرذيلة مع بعض".

وتابعت الزوجة: "ربنا أراد أن يكشف سترهم وشوفت رسايل بينهم وصور إباحية وكأنهم اتنين متجوزين، أنا مش عارفة ازاي هونت عليهم بالشكل دا وهان عليهم بناتي وسمعتهم".. موضحة أنها رفعت دعوى خلع من زوجها بعد 6 سنوات من الزواج مبررة استحالة العشرة معه.

وأضافت الزوجة: "تزوجت زواج تقليدي"زواج صالونات" بالعقد الشرعي، من 6 سنين وأنا البنت الصغيرة، واختي الكبيرة كانت متجوزة قبلي بكتير، لكن جوزها توفى بعد ما اتجوزت بـ 4 سنين، وأنا ربنا كرمني بطفلتين وكانت الحياة مستقرة مع جوزي"

وتابعت: "انا منكرش إنه زوج طيب وبيجيب لينا كل طلباتنا وعمره ما بخل علينا لكن للأسف طلع مش مخلص ولا عنده أي أخلاق، لما راح عمل علاقة مع أختي الأرملة ودخل شقتها".

وأكملت:"أختي عايشة معاه ولا عمرها فكرت في النار اللي هحس بيها لما أعرف علاقتهم، وفعلا أنا دخلت المستشفى لما شوفت صور أختي على اللاب توب بتاع جوزي وهي من غير هدوم وفي أوضاع قذرة معاه".

وأوضحت الزوجة: "مقدرتش أتكلم عشان سمعة بناتي مهما كان أبوهم ولا عرفت أوجه اختي ولا جوزي أنا أضعف من إني أقف قدامهم واتحمل اللحظة دي، عشان كدا طلبت من جوزي يطلقني"

وأختتمت: "زوجي رفض الطلاق وقعد يقول أنه بيحبني وكلام كدب من اللي كان بيضحك عليا بيه طول عمره، لكن أنا رفعت دعوى خلع بمحكمة الأسرة وقطعت علاقتي بأختي نهائيا، ومازالت الدعوى منظورة أمام القضاء".