عبير أحمد: الجامعة لها قدسيتها.. ومن حقهم الاحتفال بحدود

انتشر فيديو منذ أيام عن فتاة تحتفل بتخرجها بالرقص أمام الجميع ومنهم عميد كليتها، لتظهر العديد من التعليقات، ومن ضمنها أنها تعبر عن فرحتهال بتخرجها فقط، وقامت عبير أحمد بطرح عدة أسئلة للجميع وانتظرت الرد منهم وكام من ضمن الاسئلة "ايه رأيكم في حفلات التخرج وهل ليكم أي ملاحظات عليها"، سؤال طرحته عبير أحمد، مؤسس اتحاد أمهات مصر للنهوض بالتعليم، وإئتلاف أولياء الأمور، بعد حالة الجدل المؤيدة والمعارضة لحفلات التخرج الأيام الماضية.

وقال عبير أحمد، إن الحرم الجامعي له قدسيته وهيبته واحترامه، ومن حق الطلاب والطالبات أن يحتفلوا بتخرجهم ولكن بطريقة تليق بالمكان الذين تعلموا فيه، بدون ارتداء ملابس غير لائقة والرقص.

وانهالت التعليقات من جانب الأمهات من أولياء الأمور، في صفحة الاتحاد والائتلاف في الفيسبوك، حيث قالت ولي أمر: "كنت لسه بتكلم امبارح مع زوجي وأولادي فالقصة دي، بجد انا مش متخيله ازاي الطالبة أو الطالب يطلع يرقص علي المسرح أمام الدكاتره بتوعه بالمنظر ده ونقول دي فرحه، ما طول عمرنا بنفرح من غير رقص، وزاد وغطي كمان رقص الأمهات مع أولادهم في ايه يا جماعه".

وأضافت ولي أمر أخرى: "بقت غريبة جدا تكاليف وبهرجه ورقص ولا كأنه فرح العمده، كل حاجه في حدود المعقول والأصول حلوة وليها طعم"، وتابعت ولي أمر أخري: "اللي بنشوفه مش حفله تخرج دى حنه فى شارع".

"ازاي رقص وأغاني جوه الحرم الجامعي، فين وقار دكتور الجامعة الطلبة واقفه ترقص أمامة دا مش تخرج من جامعة خالص بصراحة"، تضيف ولي أمر أخري: "مش وحشه بس لازم يكون فيه حدود للفرحه".

واستكملت ولي أمر: "بتبقى جميلة وذكرى حلوة خصوصا إن محدش هيلاقي التاني بعد الجامعة والحياة هتاخد الجميع، بس من الملاحظ إن الموضوع بقى فرح مش حفلة تخرج"، وعلقت ولي أمر أخري: "بحس إنها بتكون مبهجه وثمرة تعب سنين لكن يجب أن تكون بالشكل الأكاديمي وليست علي طريقة حنه شيماء".

وقالت ولي أمر: "العيال مابيصدقوا يخلصوا، إذا كان سنة رابعة ابتدائي لما خلصوا امتحان رقصوا وغنوا أدام المدرسة"، واقترحت ولي أمر أخري: "لو كل دفعة جمعت فلوس حفلة التخرج وعملوا بيها حاجه لوجه الله تعالى تكون أفضل، نعرف أولادنا إن كل بداية جديده لازم تكون بداية فيها خير وبركه لكن غناء ورقص بداية خاطئه".

وتابعت ولي أمر أخري: "لسه حالا كنت بتكلم مع بناتي وزوجي عن الوضع اللي وصلت له حفلات تخرج الطالبات والفساتين السواريه والرقص الغير مبرر وظهوره علي النت بين مؤيد و معارض.. أنا عن نفسي معارضه جدا للوضع ده ومحدش يقول دي حريه شخصيه أو كل حد يفرح بأسلوبه".

بينما قالت ولي أمر: "حاجه حلوه الولاد بتحس إن رحلة التعليم خلصت وهينزلوا لمجال الشغل والحياة العملية... ربنا يفرح قلوبهم ويفرحنا بولادنا جميعا"، وأضافت ولي أمر أخري: "الفرحة حلوة مافيش كلام، بس لازم يكون في احترام للدكاترة اللي علموهم وموجودين معاهم في الحفلة والزي اللي هما لابسينه ده زي الحاصلين علي العلم مش للرقص، استلم شهادتك بكل احترام واتصور مع دكتورك اللي علمك وله فضل عليك وبعدين اخلع الزي اللي له مكانته وروح ارقص في أماكن مخصص للرقص مش للعلم والاحترام".