ميرهان حسين: الوسط الفني في مصر يخضع لمعيار العلاقات

كشفت الفنانة ميرهان حسين، أسباب ابتعادها عن السوشيال ميديا، في أول ظهور إعلامي لها بعد اعلانها اعتزال الفن.

وقالت ميرهان حسين، خلال لقائها ببرنامج "كلام الناس" الذي تقدمه الإعلامية ياسمين عز بقناة "إم بي سي مصر": "مكنش فيه موقف معين ولكن كان فيه حالة إحباط عام وحسيت إني مش مبسوطة ومضغوطة ومكنتش مبيتة النية إني أعلن فكرة الاعتزال ودخلت في مرحلة اكتئاب".

وتابعت:" أنا بنت عادية جدا ممكن اتعب واتضايق واحس بظلم فجالي خنقة خلتني عايزة ابعد عن كل حاجة ومش قصة اعتزال التمثيل للأبد، ولكن كنت عايزة اريح نفسي وابعد شوية عن كل حاجة واعتزل الناس والسوشيال ميديا لفترة محددة".

وأضافت:" قفلت تليفوني تماما ومبصتش فيه تماما وقعدت كام يوم أكتر من اسبوع مش بمسك الموبايل ولا بتفرج علي التليفزيون لإني مكنتش منتظرة حاجة تخليني اقطع اجازة الاعتزال، وأهلي مكنوش بيسكتوا وكانوا بينقلولي ردود افعال الناس".

واستكملت:" ولكن الحب اللى وصلي خضني وخلاني ارجع واشكر كل حد من زمايلي واهلي واصحابي والجمهور اللى كتبولي كلمة كويسة فرقت معايا وده حركني واثر فيا وخلاني اشوف ان الصورة مش بس سودة زي ما انت كنت شايفة".

وأشارت ميرهان حسين قائلة:" الفن المفترض يخضع لمعايير الموهبة والكاريزما ولكن الوسط الفني في مصر يخضع لمعيار العلاقات بس دي متجوزة منتج أو رجل اعمال أو دول ابناء فنانين، واصحاب الموهبة مش واخدين حقهم".

أعلنت الفنانة ميرهان حسين، ابتعادها السوشيال ميديا خلال الفترة القادمة، مؤكدة أن سبب اتخاذها هذا القرار، وهو افتقادها الشعور بالتقدير.

نشرت ميرهان حسين عبر صفحتها على موقع تبادل الصور والفيديوهات "إنستجرام" قائلة: "أجازة مفتوحة من السوشيال ميديا والمكالمات والالتزامات والمجاملات والتواجد من أجل الاخرين مش هكون موجودة ولا عايزة حاجة من حد ولا حد يعوز مني حاجة واللي زمان أنا عيشته لغيري أنا دلوقتي هعيشه لنفسي".

تابعت: "لا عايزة تقدير لا في شغل ولا في حياة ولا صحاب ولا حبايب ولا معارف ولا حاجة تستاهل ولا حد يستاهل اللي بيحبوني شكراً وكتر خيركم واللي مابيحبونيش شيلوني من حساباتكم لحد ماقدر أواجه الحياة الظالمة دي تاني سلام".

وأضافت: "أشعر بعدم التقدير لشخصي وموهبتي ولم اعتاد البقاء في مكان مع أشخاص لاتقدرني لذلك أعتزل".

يذكر أن آخر أعمال ميرهان حسين، مسلسل “مشوار الونش”، بطولة محمد رجب، ومحمود عبد المغني، وميمي جمال،ومنة فضالي، وإيهاب فهمي، وغيرهم العديد من النجوم، والعمل من إخراج إسماعيل فاروق وتأليف أحمد عبد الفتاح.