قامت الفنانة وفاء عامر بالرد على حقيقة وجود خلاف بينها وبين الفنانة منة فضالي، وإذا كانت الأخيرة استعبدتها من أحد المسلسلات مثلما صرحت في أحد البرامج.
وتستعرض "بلدنا اليوم " تقريرا عن أبرز تصريحات وفاء عامر في برنامج كلام الناس مع الإعلامية ياسمين عز، أنا محدش يقدر يستبعدني غير ربنا سبحانه وتعالى والشغل رزق، وحتى لو فيه وقيعة وأنا زعلانة معاكي هل من الشرف إني أستبعدك، يعني لو الكلام ده عليا أنا فهل ده من الشرف والأمانة والدين، بالعكس المفروض ما استبعدش حد وأساعده يأكل عيش.
وتابعت وفاء عامر كلامها عن منه فضالي، قائلة: ربنا يزيدها ويكرمها ومش تستبعدني بس لأ تستبعد كل الزملاء، ولو هي استبعدتني فشكرا ليها، وأنا أشدت بها في مسلسل جعفر العمدة وكتبت أنها عاملة خطوة مهمة مع محمد سامي ومش هغير رأيي، وأحسن حاجة يكون الواحد قادر يكون عارف قيمة نفسه وعارف إنه ما ينفعش يكون له بديل، ومنة أكيد لو قالت كده فمش قصدها ومش عاوزة أظلم حد، لأننا اتعلمنا نحترم بعض.
وتحدثت وفاء عامر عن شائعة إنجابها لـ آيتن، قائلة: أنا كنت في تانية ثانوي وفيه حاجة اسمها كمبيوتر واللي هيزور حاجة هيروح في ستين داهية، ومش عارفة الشائعة دي كان هدفها غيرة ولا إيه، ده أنا لما بكون وسط مجموعة برفض الكلام على الناس وبرفض أن حد يشتم على حد، والحمد لله فيه ناس كتير بتدافع عني واللي بيكرهوا شوية صغيرين خليهم يمشوا يدوسوا على ضلي.. وتعيش يا ضلي وتكعبل الناس، وتعيشي يا ضحكتي وتفرسي كتير، دلوقتي مش بزعل وزمان كنت بزعل واكتئب.
وأضافت: أمي اتجوزت وهي عندها 15 سنة ولو اتجوزت قد ماما كنت خلفت آيتن، ويا ريت عندي بنت زي آيتن، وبعشق بنت آيتن وبنات أختي داليا لإني بعشق البنات.
كما أعلنت الفنانة وفاء عامر سر استمرار زواجها من المنتج محمد فوزي 22 عامًا، مشيرة إلى أن علاقة الحب مع زوجها مستمرة كونها لا تحكي مشكلاتهما لأي شخص وحتى لابنها.
وأشارت من خلال تصريحاتها مع الإعلامية ياسمين عز: كلمة السر في استمرار زواجي إن ما حدش بيعرف حاجة عن مشاكلي مع جوزي، ومفيش حد مش بيتخانق والحياة مش وردي مع كل الناس ولكن الأهم إنها ما تطلعش بره البيت.
وأضافت وفاء عامر: لما أكون زعلانة وعند أمي مش بعرفها وبقول إني رايحة أعمل أكل لسي محمد، ومش بعرف حتى ابني، لأني أعتقد إن أي حد بيتدخل في موضوع علشان يحل الموضوع بيكبر بسبب الكرامة، لذلك أنا بنصح أي زوج وزوجة لو زعلانين مفيش حد يتدخل بينهم ولو حد صمم لازم الآخر يتنازل ولازم يعرفوا بعض قبل الجواز علشان الأطفال مالهمش ذنب، لإن أنتم خلفتم واتجوزتم على حب واقتناع ومفيش حد بيتجوز غصب، ليه تخلفوا والولاد يضروا نفسيا وماديا.
وأوضحت وفاء عامر أن سر استمرار أي علاقة حتى علاقة الأصدقاء هو عدم تدخل أي أحد وقت الخلافات، مضيفة: العتاب بالنسبة لي على قد المحبة، والاعتراف بالمحبة والمعروف دَين مش دين فقط، دين لإن ربنا محبة وجمال وخلق فينا الخير، ودَين لإن لما حد معترف بحبك وصاحب فضل عليك ده دَين في رقبتك لو محترموش امنعيه.
تابعوا أخبار بلدنا اليوم على Google News
