هتجوزه تاني ولا أعادي الرجال .. أبرز تصريحات رضوى الشربيني في” أنا والقناع”

كشفت الإعلامية رضوي الشربيني خلال استضافتها في برنامج "أنا والقناع" الذي تقدمه الإعلامية منى عبد الوهاب على شاشتي الحياة و CBC،العديد من التصريحات الخاصة بها ومن أبرزها:

- الحياة اختلفت بعد أمي وبقيت اعيط كتير

- الجمهور متخيل أني المرأة الحديدية وده عكس شخصيتي

- أنا متوجعتش لما مسكت قسيمة طلاقي

- كلمة انتي طالق أوقات بتكون دواكي مش وجعك

- الوجع بيكون في اللي مريتي بيه مش في الطلاق

وأشارت رضوى الشربيني قائلة :إلى أنها ليست عدوة الرجال، ولكنها عدوة أشباه الرجال المنتشرين في المجتمع قائلة " أنا جيت في الدنيا بسبب راجل وهو أبويا وسندي في الدنيا راجل هو أخويا، وطليقي راجل محترم، وبالتالي أنا مش عدوة الرجالة، أنا عدوة أشباه الرجال، ولست عدوة للراجل، اللى بيضرب مراته مينفعش يتقال عليه راجل، واللي بيشغل مراته بالسُخرة، وهو قاعد في بيته مش راجل، واللي بيعشم دي ودي بالجواز وما يوفيش مش راجل".

وأكدت إنها صادفت الحب الحقيقي بعد انفصالها، مشيرة إلي إنها قصة وانتهت قائلة "قابلت الحب الحقيقي بعد الانفصال ومكنش تعويض عاطفي وإنما قصة حب حقيقية، ولكنها إنتهت وانا مبحبش اتكلم عن القصص اللي انتهت بسبب اننا اتفقنا اننا لا نتفق".

أما عّن مواصفات الزوج الذي تتمناه قائلة "لازم يكون راجل قادر والقدرة هنا بمعنى انه يكون قادر على العفو عند المقدرة عشان مبيصش على اخطائي ولا صغائر الأمور اللي انا بعملها وهيكبر دماغه ومش هيتلككلي ومش هيبص على عيوبي، ولازم يكون قوي ويشاركني كل أموري ويكون سند وقوته دي تكون معايا مش عليا ولما يقرر انه مش عاوز رضوى الشربيني مبعملش اي حاجة غير انه هيجبني ويقولي في وشي انا اسف من قادر أكمل".

وأكلمت وصفها قائلة "لازم يكون ناجح مقدرش اتجوز راجل مش ناجح ولا انا اكون أنجح منه، ويكون عنده طموح ويتقي ربنا في البني ادمين ومكونش انا اولهم لكن مامته وباباه، ولازم يكون بيحبني قوي وبيهتم بيا قوي ويعرف يتعامل معايا لأن أنا صعبة، ويكون حنين وطيب ودمه خفيف عشان مقدرش اتجوز راجل دمه تقيل ابداً، ويكون شيك وخفيف في نفسه".

كما قالت الشربيني "الحياة بعد وفاة امي اختلفت كتير وبقيت بعيط قوي، والناس واخده عني صورة المرأة الحديدية اللي من غير مشاعر ولا شعور وده عكس شخصيتي"، وأَضافت إنها لم تشعر بالوجع عندما امسكت ورقة طلاقها بيدها مؤكده أن رصيدها في بنوك الوجع أكثر بكثير من قسيمة الطلاق حيث قالت عن تجربتها "اكتشفت نفسي ولقيت اني انسان مش قابل يعيش العيشة دي، ورصيدي في بنوك الوجع اكثر بكثير من قسيمة طلاق، ومقدرش اعد الاوجاع دي".

وأضافت "قسيمة الطلاق مش وجع إنما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وأنا متوجعتش لما مسكت قسيمة طلاقي في ايدي، ومش في كل الاوقات كلمة انتي طالق بتوجع، خصوصاً اذا كان عندك قناعة إن الكلمة دي هي دواكي مش وجعك".