حلت الفنانة المعتزلة زيزي عادل، ضيفة في برنامج "كلام الناس" الذي تقدمه الإعلامية ياسمين عز، على قناة mbc مصر.
نرشح لك: بعد سلسلة من الأقاويل.. نادين الراسي تُعلن انفصالها عن خطيبها
ويُقدم لك "بلدنا اليوم" في هذا التقرير أبرز تصريحات زيزي عادل، خلال الحلقة.
- لو رجع بيا الزمن أكيد مكنتش هروح برنامج ستار أكاديمي، عشان دلوقتي بعد تغيير فكري وتقربي من ربنا وكل اللي بيحصلي ده يخليني أقول إن كان فيه حاجات كتير مكنش المفروض أعملها، ولكن أنا من الناس اللي مبتندمش وبشوف إن كل حاجة حصلت في حياتي ليها ترتيب وكل حاجة ليها أسباب.
- تجربتي في ستار أكاديمي كانت هي بداية النجاح والانطلاقة، أنا نزلت من البرنامج مشهورة مع إني مكنش عندي أغنية ولا أي حاجة، ولكن كنت مشهورة كأني نجمة بقالي 10 سنين بغني، ولقيت عروض من شركات إنتاج كبيرة، ولما رجعت مصر مصدقتش عدد الناس اللي كانوا جايين يستقبلوني، لأن أنا قعدت هناك 4 شهور مفيش تليفزيون ومكنتش عارفة أنا معروفة برا ولا لأ، ولا أعرف كان بيتكتب عني أخبار ولا لأ ولما رجعت في صدمة بتحصل كده إني مشهورة والدنيا بتختلف.
- ستار أكاديمي كبرنامج فكرته لا تناسب تقاليد مجتمعنا، كان فيه كاميرات في كل مكان، حتى الحمامات كان فيها كاميرات عند المرايات، والموضوع ده كان بيضايق.
- خلينا متفقين إن في أسس علشان انتي مغنية لازم تعمليها، في كذا حاجة بتحصل غلط، علشان أقول كلام حب أو هجر فيه تحريك للمشاعر ودا كله حرام الفكرة كلها على بعضها حرام.
- لما أطلع على الاستيدج لازم ألبس فستان وأتحرك مع المزيكا أكيد مش هقف تمثال، وكان فيه حاجة بتضايقني جدًا في الحفلات مش عندي قدرة ألغيها وأنها إن اللي حاضر بيصورني من زوايا زي ما هو عاوز وبيجيب من الحتة اللي عاوزاها ومش عندي الحق أقول له ما تصورش.
- أنا معرضة أني أتصور على كل موبايلات الناس، بتصور من زواية اللي هو يختارها، وبيزوم من الحتة اللي هو عايزها، أنا معرضه إني اتصور على كل تليفونات الناس، وبعدين تروح تفرج صاحبك عليا.
- سألت نفسي ليه أكون متاحة لكل الناس وعلى كل التليفونات، ليه ماكنش ست قاعدة في بيتي مش متاحة لكل الناس.
- الغناء فيه أسس لازم تتعمل علشان أكون مطربة منها إني أعمل فيديو كليب ويكون معايا موديل، وفي كذا حاجة غلط بتحصل.
- اعتزالي مالوش علاقة بجواز ولا ارتباط، جت من عند ربنا، ربنا قالي سيبي وخلاص، حاجة بتحصل مينفعش تتوصف، كإن ربنا بيقولك كفاية لعبنا وهزرنا وخلصنا خلينا نعمل للي جاي.
- لما بتعتزلي عشان حد أو تتحجبي عشان حد عن عدم اقتناع بتلاقي الجوازة باظت ونرجع نمثل ونقلع الحجاب.
- قالوا إني اتجوزت داعية وهو اللي أقنعني بالاعتزال، لا أدري السبب وراء هذه الشائعات، لسته متزوجة أو مرتبطة من أي شخص، فكرت في الاعتزال من عند الله، حسيت أن ربنا بعت لي بعت لي وقال لي سيبي الفن، معرفش ليه بيجوزوني كتير كدا، ودي بشرة خير ويا رب أتجوز بس دا مكنش حقيقي والاعتزال مكنش ليه علاقة بالارتباط أو الجواز.
- كل ما كان يشغل تفكيري أثناء عملي بالفن، هو ملابسي وشعري والأغاني التي أقدمها، اكتشفت إني مش هاخد معايا كل دا ولا نسب المشاهدة والإعجابات، هاخد معايا أعمالي وبدأت أفكر إني مش مستعدة أقابل ربنا بـ حياة المطربة، وكنت عايزة أحس إني مستعدة أقابل ربنا لأن محدش صغير على الموت.
- اكتشفت أن الموت ملهوش سن ومفيش حاجة اسمها بدري، وهذا كان سر خوفي واعتزالي الغناء لأني مكنتش مستعدة اقابل ربنا.
- طريقة لبسي بعد الاعتزال اتغيرت وبقيت محتشمة كتير، لكن ينقصني الحجاب بس، وان شاء الله قريب ربنا يقويني يعلى الخطوة دي.
- اخترته الداعية مصطفى حسني، لدعمي في قرار اعتزال الغناء لإني بحب اسمعه وبتابع فيديوهاته من قبل الاعتزال، وبحب كلامه وهو بيتكلم عن التسامح وأمور إيجابية جدا، وبيقدر يوصلي المعلومة بطريقة حلوة وهو كلامه مريح.
-
تابعوا أخبار بلدنا اليوم على Google News
