حل الفنان محيي إسماعيل، ضيفًا في برنامج "حبر سري" الذي تقدمه الإعلامية أسما إبراهيم، على قناة القاهرة والناس.
نرشح لك: لدوره في مسلسل توبة.. عمرو سعد يحصد جائزة أفضل ممثل بحفل دير جيست (صور)
ويُقدم "بلدنا اليوم" أبرز تصريحات محيي إسماعيل، خلال الحلقة:
- أحب اتفرج على نيللي كريم وهي ممثلة حساسة وعندها قدرة على التقمص وهي بارعة، وكنت معترض على وجودها في لجنة تحكيم لأني مشوفتلهاش حاجة خالص وده كان خطأ مني.
- أمير كرارة لو عمل حاجة كوميدي هيكسر الدنيا، وهو دمه خفيف ومتنوع بما يقدمه من إعلانات ومسلسلات وأفلام.
- أمير كرارة ناجح في كل شيء والبطل ملوش مواصفات في الوقت الحالي.
- أنا بخاف من الموت ومبحضرش جنازات عمري وهذا خطأ في تكويني الشخصي لأنني أخاف الموت، حصلي موقف واحد مرة ضحك عليا وقالي أنزل أدفن معايا شفت المقبرة من جوا وطلعت مغمى عليا فحرمت، كل إنسان ليه قدرات.
- بخاف أدخل فيلم وميكونش الإنتاج جاهز والعملية مدروسة صح، وبخاف من الطيران طول ما أنا راكب الطيارة صاحي، بروح أمركيا صاحي وأقول لأصحابي مش لو الطيارة وقعت أقولكم.
- وقت فيلم بئر الحرمان، كنت إلى حد ما منضبط أخلاقيا، كنت بصلي قالولي قبلة ورفضت أبوس سعاد حسني، قالولي أنت أهبل دي سعاد مش هتشوف السينما تاني طول عمرك، وفين وفين قبلت، وكانت قبلة جميلة.
- المستقبل بيد الله مش بإيدي، أنا مكنتش فاهم أوي وبحب الأدوار الإنسانية، ولم أغير أي شيء في حياتي ومبادئي ثابتة، لكني طورت من شخصيتي.
- هناك نجوم وفنانين عالمين كانوا كبار في السن وتزوجوا من فتيات صغيرات وكانت علاقتهم الزوجية ناجحة، زي الرسام الشهير بيكاسو حب واحدة عندها 18 سنة، فاالعمر ملوش قيمة عندي والمهمة الصحة تبقى كويسة.
- شرط في الفتاة اللي اختارها أن تسعدني لا أن ترمي حمولها عليا، وكثيرين هنا مش بيعرفوا يحبوا ومفيش مصداقية حتى في شكل العلاقة، ونسبة الطلاق بقت عالية وللأبد وكل حاجة بقت مكشوفة والتليفون بوظ كل حاجة في الدنيا، وأنا حبيت قبل كده واحدة ألمانية وبرضو حبيت تركية.
- معنديش خصام مع أي حد في الوسط الفني ومحمد صبحي أحترمه وأقدره.
- الأزمة كانت بسبب المخرج وليس الفنان محمد صبحي ولكنه كان شريك في الانتاج وقتها، والفيلم كان به شخصية واحد مصاب بالصرع نفسه دوره في الاخوة الأعداء.
- لو كريم عبدالعزيز كان موجود في زمن السبعينات كان هيكون نمرة واحدة وربنا عطاه كاريزما وموهبة وقبول ونفسي أشوفه.
- "مش بحب اتكلم في الماديات لأن دي حاجات لها رزق، وفيلم الباطنية كنت هعمل دور أحمد زكي واختلفنا على ألف جنيه ومعملتوش.
- كان أتمنى تجسيد دور أحمد زكي في فيلم زوجة رجل مهم ولكني لم أصاب بالغيرة من الفنان الراحل لأنه قدم أدوار رائعة في مسيرته الفنية أيضا.
- محستش بتقصير تجاه موهبتي وربنا بيعطي كل واحد قدرات عليه أنه يظبطها، وأنا مسرف لدرجة السفاهة وأكثر حاجة بصرف عليها أكل الفقراء.
- في الحب مفيش عقل ولكن معتقدش اتجوز بنت أصغر مني بسن كبير لأن الفن واخد كل حياتي الأن.
- حسابي في البنك، رصيدي نزل فيه، فبقى كل ما أملك ربع مليون جنيه، يكفوني خمس، ست أشهر.
- الست أشهر القادمين متعرفيش الظروف الاقتصادية إيه؟ وهل فيه حرب ولا لا؟ فالحمد لله رضا على كل حال.
- محدش قدر ينصب عليا، لأني بكون حريص، فأنا أديت فلوس لناس كتيرة محتجاها، واستطاعوا حل أزماتهم، ومش عايز حاجة منهم.
- المهندس نجيب ساويرس حب يدعوني لمهرجان الجونة فقالي :أنت صحيح أفضل من آل باتشينو، فقولت له :أفضل منه بكتير
- وقت ظهوري آل باتشينو مكانش ظهر على الخريطة، ثانيًا أل باتشينو عنده وكيل أعمال، أنا معنديش وكيل أعمال، ثالثًا بياخد ملايين أنا باخد ملاليم، رابعًا هو بيشتغل في جو صحي، أنا في جو سئ.
- هو بيشتغل في ظروف أحسن مني، فلما قدمت فيلم الاخوة الاعداء وحصلت على جائزة على 11 نجم، إذن أنا أحسن منه.
- أنا صاروخ انطلق، إذا وقف احترق، وإذا كان لا بد من لقب نمبر وان، فلا أحد قبلي أو بعدي نمبر وان، ولا يوجد من ينافسني ولن يوجد.
- عمري ما بحب أعمل مشاكل، لكن اللي عايز يعمل مشاكل معايا أنا موافق، أرفض بطولات كثيرة، وأنا حاليا بطل فيلم مهم هو الكومندا.
تابعوا أخبار بلدنا اليوم على Google News
