سهير جودة: امرأة وحيدة تساوي حياة أفضل ولكن مستحيل تبقى السعادة في استمرارها

حرصت الإعلامية سهير جودة، على التعليق على ما كتبته المخرجة هالة خليل مؤخرا على حسابها الشخصي عبر فيسبوك، وتقول «إن الوحدة قفص من ذهب تصنعه أحيانا بنفسك ليحميك من الوحوش الكاسرة»، بالرغم من أن الوحدة عكس الطبيعة، هي الونس والحياة، وزي ما بيقولوا الجنة من غير ناس ما تنداس، أنا بشوف أن مستحيل تكون السعادة في الوحدة، إلا لفترة مؤقتة وليها أسباب».

وأضافت سهير في برنامجها الذي يحمل اسم «الستات»، والمذاع عبر فضائية «النهار»، قائلة: «أحيانا بتكون الوحدة اختيار بس المفروض تكون لفترة مؤقتة، وفي دراسة أمريكية كشفت سر صحة وسعادة الست، وطلع إن الستات بيخافوا من الوحدة اكتر من خوفهم بالإصابة بالسرطان، تخيلوا احنا بنسميه المرض الوحش، والوحش الكاسر، ولكن هاجس الوحدة أصعب عند الستات من الإصابة بالسرطان، خاصة لما تكون ست مبتشتغلش أو بتشتغل بس معندهاش ولاد، معندهاش زوج، ولو أن أحيانا الوحدة خير من الزوج السوء».

وتابعت سهير: «الإنسان بيكون مجبر على الوحدة لما يعدي بمشكلة عاطفية، أو عنده وحدة عاطفية، وفي الحالة بيبقى عايز يقعد لوحدة، ويمكن الرجالة بتحس بالموضوع ده أكتر عشان تعرف يعد كده تقيم الأمور، لكن الست بتبقى مرتبكة ومش عارفة تتصرف، ودايما دكاترة الطب النفسي بيقولوا أن دايرة المعارف والأصدقاء هي جزء مهم جدا من العلاج».

وأكدت سهير جودة: « الست اللي بتختار الوحدة إما تكون مبدعة فبتحاول تنجز مهمتها الإبداعية، أو أنها انجرحت في حياتها العاطفية فبتلجا للوحدة، لكن لو الوحدة طولت اعتقد هتكون مأساة للستات والرجالة، وبشوف ناس ساعات الوحدة بتخليهم يعملوا تصرفات غير طبيعية وبيبقوا عايشين في مأساة كبيرة جدا».