قالت الفنانة ليلي عز العرب بحب أبدأ الحاجة من الصفر، ولما أحقق حاجة بحب أبدأ حاجة تانية من الصفر، قبل التمثيل كنت فى title كبير فى قطاع البنوك، كنت مدير عام رئيس قطاعين ده قبل نائب رئيس مجلس أدارة على طول، وقعدت في الشغلانة دي 30 سنة فاكتفيت، و لما كنت فى المنصب وبروح أمثل كان زمايلى بيفرحوا اوى، جاء ذلك خلال مداخلة هاتفية لبرنامج اللمة تحلى على شعبى اف ام تقديم شيماء السباعي.
و أضافت انا زوجة مطيعة جدا وعشان أمثل اتخانقت مع جوزى خناقة كبيرة، وبطلت فترة إرضاء له، بس لما جاتلى فرصة حقيقية اتمسكت بيها اللى هى فيلم "ألف مبروك" مع أحمد حلمى، وبعد نجاحى بقى زوجي داعم بس ما بيحبش يتفرج على اى حاجة انا فيها بس هو مش تليفزيونى عموما وبيقولى انتى بالنسبة لى مراتى مليش دعوة بالفنانة.
والناس بتنادينى فى الشارع بالحاجة "سامانتا" كأنى ما عملتش حاجة فى حياتى غيرها، يا إما أم الكبير ونادرا ما يتذكروا الف مبروك حتى الكشك اللى جنب البيت بيقولى أم الكبير جت.
وعن أجمل كواليس صورتها فقالت كانت فى مسلسل "الكبير أوي"، و علاقتى بمكى هو فعلا ابنى فأنا أم الكبير فعلا، كمان الناس اللى ورا الكاميرا ولادي وإحنا عيلة كبيرة وإن شاء الله يبقى ليا نصيب أكبر فى الجزء السابع من الكبير .
وتابعت : التمثيل حلو فى اختلاف الأدوار، تقديم البرامج يديكى فرصة انك تقولى كلمة طيبة توصل للناس بس لولا التمثيل ما كنتش هقدر اقدم البرنامج.
وعن مسلسل "الاختيار" فقالت أنا بسعد فيه حتى لو طلعت مشهد صامت، بحس كده إن ده توفيق ربنا، وده الذاكرة اللى هتفضل معانا كتير وكل ما ننسى نفتكرها، وفعلا قولت أنا نفسى أطلع أم كريم عبد العزيز و فعلا اتحققتلى الامنية.
و انبسطت اوى لما كلمونى من يومين و قالولى هنكمل العميل صفر مع اكرم حسنى لانه دور مختلف جدا و هيبقى فيلم كوميدى فظيع.
وتابعت الإفطارات العائلية ولمة العيلة من العادات أو الطقوس اللى مفتقداها فى رمضان، والسنة دى فطرت فى البيت مرتين.
واختتمت قائلا لما كنت بصور مسلسل "فوق مستوى الشبهات"، كان الدور بيجيب كآبة، واللى كان بيخرجنى من الكآبة دي هي إذاعة شعبى اف ام، وعايزة أهنى كل مستمعى شبكة راديو النيل وكل العاملين فيها وأقولهم كل سنة وأنتم طيبين وإن شاء الله عيد سعيد عليكم.
تابعوا أخبار بلدنا اليوم على Google News
