«كلمت ربنا ورد عليا».. نشوى مصطفى تكشف سبب انسحابها من الوسط الفني

تعرضت الفنانة نشوى مصطفى، منذ فترة بالاكتئاب ولهذا السبب اعتذرت عن الكثير من الأعمال الفنية.

وكشفت اليوم الجمعة عبر حسابها الشخصي على موقع التواصل الاجتماعي فيس بوك.

وكتبت نشوى مصطفى: “حاحكى لكم حكاية على سبيل الفضفضة واسفة لو حازعجكم، بقالي فترة طويلة مش باشتغل التمثيل اللي اتمناه، اللي هو طموحي، واللي هو أنا لحد اللحظة دي مامثلتش طموحي، ولا حتى شبه طموحي، إلا في شوية أعمال يتعدوا على الصوابع ومنهم مثلًا المسرحية اللي كتبتها على مقاس احلامي في التمثيل، أقصد سيلفي مع الموت، ولأن الكلام ده كان من أربع سنين فالتمثيل وحشني أوي”.

وتابعت : «كنت فاكرة أن أي شغل حيجى لى حوافق على طول، لقيت نفسى بيتعرض عليا ادوار باقراها واعتذر، وبعد ما اعتذر اقعد فترة مكتئبة والوم نفسى طيب ليه اعتذرت، فانفسى ترد تقول لى ماهو انتى ماحسيتيش انك حابة اللي قريتيه يومين تلاتة وانسى».

ووضحت: «أمس الاول اتعرض عليا شغل والحقيقة النهارده اعتذرت، وكلمت الاستاذ المخرج المحترم الراقى وقلت له اسباب اعتذارى وكان رده كنت متأكد انك مش حتوافقى وباحترمك جدًا لانك رفضتى لان كان فيه رهان- حد قال انك حتوافقى لان بقالك كتير بعيد وانا قلت له غالبًا حتعتذر رغم أن مساحة الدور كويسة، قلت له يااستاذ مثلًا الزميل العزيز ماجد الكدوانى عمل مشهد واحد في مسلسل عظيم اسمه تحت السيطرة، والحقيقة مفيش حد يقدر ينسى العظمة اللي عملها رغم انه مشهد واحد الموضوع مش مساحة، المهم اعتذرت وخلاص ولقيت نفسى بعدها مش مبسوطة».

وتابعت: «كلمت ربنا وقلت له يارب انا مش فاهمانى وحضرتك اللي خلقتنى وعارف نقط ضعفى، وطلبت منه يفهمنى ويرضينى بالمقدر ليا، وسبحان الله بافتح الفيسبوك لقيت بوست مكتوب فيه من يترك كل أمره في يد الله سيجد يد الله في كل شئ يخصه، وعلى طول غمضت عينى وابتسمت لان حسيت أن ده رد ربنا سبحانه عليا وبعدها قعدت اردد اللهم إنى اسلمت لك نفسى ووكلتك أمرى فأنت حسبى ووكيلى، وصلى الله على سيدنا محمدًا النور واهله».