"كلمة حق".. بدرية طلبة تخرج عن صمتها وتشيد بـ "تامر حسني" (تفاصيل)

خرجت الفنانة بدرية طلبة عن صمتها وعلقت على أزمة الفنانة حلا شيحة الأخيرة، مع الفنان تامر حسني.

وقالت بدرية من خلال حسابها الخاص بموقع التواصل الإجتماعي الشهير "فيسبوك"، "أنا بحب كل زمايلي وبحسهم اخواتى وولادى واساتذتى وفى النهايه بعد اى شغل بروح على بيتى وبتابعهم زى المتابع العادى وبحب أقول كلمة حق في الزملا القريبين منى واللى اتعاملت معاهم عن قرب ولازم اقولها فى وقتها وانهاردة وقت كلمه حق فى النجم تامر حسني اللى بعرفه عن قرب من يوم ما ظهر وانا بشوف منه مواقف محدش يعرفها ولا يصدقها أد أيه هو بنى أدم جبار".

وتابعت بدرية، "لكن يكفى احكى لكم اخر موقف يوم عمليه زميلى واخويا شريف دسوقى والمكالمات اللي كل يوم بيتحايل فيها يشيل شريف دسوقى فى عنيه لكن كان الريس سبقه ولما ظهرت حاله شبه حاله شريف وتكلفتها عاليه وطلبت منه يتدخل قسمابجلال الله الموضوع ماموضوع فلوس لكن لو تسمعو نبرة صوته وعياطه وحزنه على الحاله لما سمع الفويس بتاعها وهى فرحانه بالطرف الصناعى حتعرفو من نفسكم البنى ادم دا من جواه ايه وأد ايه أنسان مش بتاع شو غير كل دا كواليسه كلها حب واحترام لزمايله الصغير قبل الكبير ومنتهى الاحترام والادب واستحاله يضايق او يزعل حد ربنا يجبر بخاطرك وتعلى كمان وكمان تستاهل كل خير".

حلا شيحة عبر انستجرام

حالة شيحة كتبت منشورا عبر انستجرام، انهالت عليها التعلقيات والانتقادات، حيث كشفت حلا شيحة عن تبرؤها من العمل فى الوقت الراهن وطرحه فيديو كليب بحبك من فيلم بسبب تضمنه مشاهد رومانسية تجمعها مع تامر حسنى.

حلا شيحة تهاجم تامر حسني

حلا شيحة أضافت عبر حسابها بموقع انستجرام مهاجمة تامر حسنى: "أنا اتفاجئت جدا بنزول كليب يجمع فيه مشاهد متفرقة من الفيلم و خصوصا بعد آخر بوست نزلته و وضحت فيه انا ايه ..و اتفاجئت اكتر خصوصا بعد وعد تامر حسني ليا وتأكيده انه حیحترم رغبتي و بعض الطلبات اللي طلبتها منه بكل احترام وود الصيف اللي فات وأکدلي إنه حيحترم رغبتي".

حلا شيحة: زملائي جواهم خير

وأضافت حلا شيحة: "إحنا يمكن نجحنا بمقايس الدنيا بس صدقوني بمقایس ربنا احنا لم ولن ننجح انا عارفة و متاكدة ان زملائي جواهم خير بس للاسف فتنة الشهرة و النجاح مش بتخلينا نشوف ونقيس الامور صح بتكلم من قلبي الكليب ده ميرضيش ربنا و انا عيطت لاني شفت نفسي في المشاهد دي .. دي كانت زلة نتيجة ظروف مريت بيها و كلنا بنغلط و لازم نغلط علشان احنا بشر بس المصيبة اننا بنغفل وبننسی".

حلا شيحة: مش هتكسف من حد

وتابعت حلا شيحة: "انا مش حتكسف من حد انا تبت من المشاهد دي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فن".

حلا شيحة توجه رسالة للفنان تامر حسنى

وأكملت حلا شيحا: "احنا كلنا عندنا امتحان في الدنيا دي و حابة افكرك بالفيديو ده یا تامر اللي قولت فيه انا مش بتمني أموت وأنا مطرب انا دايما خايف کده.. كلام أكيد قولته في لحظة صدق جواك و جوانا كلنا من شوفه تاني يمكن يفكرك أن جواك اكيد في صراع و انا و كلنا كلنا بنغلط بس المهم في الاخر نتدارك الغلط و نصلح إلا من تاب و امن عمل عملا صلحا أوللېك يبدل الله سيئاتهم حسن وكان الله غفورا رحيما.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".