"علق على ملفات خطيرة".. المكالمة الكاملة للرئيس السيسي في برنامج الحكاية

في مداخله هاتفية مع الإعلامى عمرو أديب، علَّق الرئيس عبدالفتاح السيسي، على عددة ملفات هامة كان أبرزها تعليقه على واقعتي عقار فيصل المحروق، وعقار الإسكندرية المائل الكائن في 36 شارع أبو الحسن بمنطقة كوم الشقافة كرموز نطاق حي غرب بالإسكندرية، حيث وجه حديثه إلى مقدم البرنامج: «الغرض من المداخلة هو الاستفادة من واقعة الإسكندرية عشان نقول للناس المشكلة الموجودة في بلدنا، فواقعة عمارة الإسكندرية وعمارة فيصل من الواقع اللي إحنا فيه».

غياب الدولة لسنوات

وأضاف «السيسي»، أنه «خلال سنتين أو ثلاث تحديدًا عندما أطلق ملف المصالحة على مخالفات البناء، كانت رسالة للمواطنين إن فيه مشكلة كبيرة، من ضمنها إن الدولة غايبة لسنوات طويلة وهو ما يعني أن الإجراءات غير مسيطر عليها، وكل واحد حسب ما هو شايف، فيه فساد إداري وتنظيمي، سلوك الناس حسب ما شايف وحسب مصلحته، كان فيه فساد إداري وتنظيمي وكان حجم الطلب كبير، الناس كانت عاوزة من 800 أو 900 ألف وحدة سكنية سنويًا، بل تصل لـ مليون وحدة ».

تنظيم الأسرة

وأوضح رئيس الجمهورية، أن ملف تنظيم الأسرة يحظى باهتمام الدولة، «بس اوعى تتصور إننا نعمل إجراء قانوني شديد مع الناس في المرحلة دي، حالة الثورة واللي حصل في 2011 أوعى تتصور أنها خلصت أو انتهت، اللي بنعمله فوق طاقة الناس وفوق طاقة الدولة المصرية، لازم تقولوا أزاي ده بيتعمل، لازم تقولوا الأموال دي بتيجي منين، بتيجي من مصر»، كما أن مصر قد تحتاج إلى مليون وحدة سكنية سنويًا للتعامل مع أزمة الإسكان، «يا جماعة إحنا دارسين حاجتنا ومستعدين ومصرين على أن نواجه ما لدينا».

حل مشكلة العشوائيات

وتابع: «هنحل مسألة المخالفات، لكن أوعوا لما تفتكروا إني لما يكون عندي مثلًا 100 ألف مخالفة أو 200 مخالفة هقدر أمشيهم من البيوت بتاعتهم وأوديهم في حتة تانية، وعشان نهد البيوت دي كلها محتاجين مليون شقة، بمتوسط 400 مليار جنيه شقق في الإسكندرية، عشان أحل أزمة العشوائيات في مصر عاوز بتاع 3 أو 4 تريليونات جنيه، الناس كانت عاوزة تعيش ويتعمل لها بيوت، لكن البلد مكنتش قادرة تعمل ده، لكن لما تقول لي هتقدروا تعملوا ده؟! هقول آه هقدر أعمل لكل الأجيال القادمة بفضل الله».

توفير التمويل

وواصل الرئيس: «أقدر أعمل مليون شقة في السنة ماليا وتنظيميا وإداريًا، لكن عاوز أوفر لهم على حسب قدراتهم، لأن موضوع الإيجار تجاوزناه كفكر وثقافة لأن الناس عاوزة تعيش في شقة مملوكة»، كما أنه نفذ كل وعوده، في إشارة إلى الجهود التي بذلتها الدولة المصرية في القضاء على العشوائيات: «الحمد لله رب العالمين مقلتش كلام معملتهوش، والكلام اللي قلته على المساكن قلته من 7 سنين، قلت إن عندنا 40% لـ50% من مصر عشوائيات، بس لما بنعالج المسائل بالمراحل، فيه أولويات».

تقليل النمو العشوائي

وأردف رئيس الجمهورية، «داخلين على الريف وسنطور 4500 قرية بتوابعهم، وأقول مرة أخرى مبقتش المشكلة في توفير التمويل اللازم، نحن قادرون على التمويل والـ500 مليار جنيه جرى تدبيرها على 3 سنوات، اللي أنا عاوز أقوله إننا بنتحرك في تقليل حجم النمو العشوائي، بأن نوفر حجم المطلوب دلوقتي، وإننا نوفر الطلب اللي ممكن يتطلب السنة دي والسنة الجاية والسنوات القادمة»، موجهًا حديثة إلى الشعب المصري بخصوص أزمة الزيادة السكانية، قائلًا: «انتو يا ترى منتبهين لكلمتي عن النمو السكاني ليكم ولا لأ؟».

الرئيس السيسي يُمازح عمرو أديب بسبب «الوقت»: مش عايز اخد البرنامج منك

وتابع الرئيس خلال مداخلته: «خلي بالك، اللي شايفينه من عشوائيات بالحجم ومشكلات كتير في قطاعات الصحة والزراعة والصناعة ده ناتج اللي بيولد 3 و4 و5، ومش عاوز آخد البرنامج منك عشان تكمل»، ليرد عليه مقدم البرنامج: «لأ يا أفندم خد البرنامج كله، على مستوى الدولة، أنت بتشتغل وتنظم نفسك بتخلي بالك إنك تحافظ على استقرار المجتمع في ظل التحديات التي تمر بها مصر، وعمومًا فإن قضية النمو السكاني كانت موجودة في أيام الرئيس عبدالناصر والرئيس السادات والرئيس مبارك وما زالت قضيتنا».

مشكلة سد النهضة

وأوضح الرئيس عبدالفتاح السيسي، أن قلق الكثيرين من السد الإثيوبي، قلق مستحق، «نتحرك بشكل تفاوضي ودي عملية أشبه بمقاتلة، إحنا نقاتل بالتفاوض، عشان نحافظ على الأمور ونحافظ على حصة مصر، ونسير حول عدد من الأمور ومسارات مختلفة»، وأنه اتخذ على عاتقه إصدار قرار تبطين الترع، «دي من ضمن الإجراءات اللي ممكن نعملها من أجل تقليل حجم الفاقد من المياه»، و تم إنشاء محطة معالجة للمياه في منطقة بحر البقر، تكلفت حوالي 20 مليار جنيه.

وأشار الرئيس، إلى أنه ستقوم تلك المياه التي سيتم معالجتها من ري 400 ألف فدان في سيناء، فضلًا عن محطة معالجة بمنطقة الحمام، «محطة الحمام هتجعلنا نستفاد من 6 ملايين متر مكعب من المياه كانت تلقى في الصرف، سيتم معالجتها على أحدث الطرق واستخدامها في زراعة ما يقرب من نصف مليون فدان»، مؤكدًا أن مشروع تبطين الترع كان من الممكن أن يأخذ وقتًا من 10 لـ 15 سنة، «لو قدر يخلص في سنتين التمويل موجود، إحنا شغالين على عدة محاور».

تخفيض حجم الفاقد من المياه

وأوضح أن مصر تحاول تخفيض حجم الفاقد من المياه للاستفادة منه وإعادة تدويره، «طول ما أنتم كده مع بعض، وثابتين، هنصل لنتيجة بالتفاوض والصبر والثبات وطولة البال في ملف السد الإثيوبي»، كما طمأن الرئيس عبدالفتاح السيسي، الشعب المصري عن مصادر الأموال التي تضخها مصر لإنشاء مشروعات جديدة، قائلا «بتيجي من مصر، مش هنحرم الناس أكتر من كده، ومش هنرمي همومنا على الآخرين، إحنا قادرين ومعانا وبفضل الله نقدر نعمل كتير، لازم الناس تتفهم أسباب ما نحن فيه ».