يكشف يوميا زملاء وأصدقاء الراحل أحمد المنسي، العديد من المواقف التي جمعتهم به، بالتزامن مع عرض مسلسل الاختيار للنجم أمير كرارة، وكان آخر هذه المواقف ما ذكره زميل المنسي الذي يتسم بالطيبة وحبه للوطن والسعي الدائم لرسم السعادة على وجوه من حوله.
وقال سامح مشالي صديق الشهيد المنسي، عبر حسابه الشخصي بموقع فيس بوك : "انا مبحبش أمير كرارة ده مبدأيا بس انا بحب المنسي القائد الجدع اللي شوفته أول مرة في أرض الطابور في مدرسة الصاعقة و هو بيختار رجالة الـ ١٠٣ ... شوفت بصته في عنينا شوفت منه شجاعة شوفت قدامي لأول مرة بطل حقيقي جايلنا و هو واخد رصاصة في كتفه ومعلق دراعه شوفته وهو بيتكلم عن جندي بطل شال المنسي لما اتصاب و بعدها في مداهمة تانية المنسي شاله وهو شهيد".
وتابع: "شوفت واحد بيبص في عين كل واحد فينا و بيقولنا يا فدائي ويا بطل ويا وحش وبيعظمنا ... شوفت قائد بيقولنا أنا عاوز معايا رجالة ياخدوا رصاصة في صدرهم مش عاوز أخد واحد ياخد رصاصة في ضهره و يتسمى شهيد على الفاضي ... شوفت بطل بيضحك في وشنا و سمعته حلوة و العساكر اللي جايه معاه بتحبه، سمعت منه بوداني لاحقا و هو بيحكي و مقهور أن فيه حد وهو بيدرب العساكر رقدهم وأهانهم و اذاي أن ده مش مفروض يحصل وأن مينفعش عنده عسكري يرقد و يتهان".
وأكمل : "ربنا كرمني معاه بكام قعده اسمعه فيهم وهو بيتكلم و بيهزر ولاحقا بعد استشهاده اتفاجأت أنه كان ناشر صور من تصويري كتير على بروفايله وعجباه وقولت ياريت الزمن يرجع وأقوله أن ده شغلي وأقربله أكتر، المنسي كان مصدق تماما أن اللي بس حصل في البلد كوم من اختلافات سياسية و معارضة و اللي بيحصل في سينا من التكفريين كوم تاني و حرب ضروس وأنا كنت مصدقه جدا ومقتنع بده جدا لأنه وهو بيتكلم عمره ما خون معارض بالعكس خالص كان شايف أن فيه شباب كتير أوي رجالة عاوزين يضحوا بروحهم عشان خاطر البلد وبيحبوها مش عشان فصيل و توجه".
وأردف: "المنسي كان بني آدم عادي جدا فيه حاجات بتعجبه وحاجات لأ بس في حب الوطن وترابه والدفاع عنه مبيفاصلش وبيسبق جنوده للشهادة ... انا شفت فيه أخ لجنوده و كان أسوء يوم في حياتي فعلا يوم الجمعة ٧ يوليو ٢٠١٧ لما الفجر لقيت مكالمة جيالي من صديق معاه في ١٠٣ الساعة ٧ ص بيصحيني بيقولي البقية في حياتك المقدم في ذمة الله شهيد من كتر ما كله عارف ازاى بحبه وواخده قدوه ... حسيت بتلج و تكذيب لوداني كنت ساعتها نازل مأموريه في إسكندريه وكنت في البيت".
واختتم: "قلتله ايه اللي حصل وقعدت أدور واتطمن على باقي زمايلي و دفعتي بالتليفون لأني قوة انشاص بس صحابي واخواتى هناك وعشرة دم ... اتصلت بالقائد المباشر بتاعي وبكذب نفسي و بقول أكيد في المستشفى وحيقوم فأكدلي الخبر ساعتها محستش بنفسي حزن ونار وجسمي بيصرخ وحاسس أنى لازم أخد بتاره أنا مبعيطش أصلا جبله يومها انهارت زي العيال الصغيرة عليه وكملت بعد كده لما سمعت قصص الرجالة استشهدت معاه وصحابي اللي اتصابوا وكانوا رجالة لآخر لحظة ... الأصعب كان بعض الناس اللي زايطه على النت و كانوا بيقتلونا كلنا ١٠٠ مرة اللي يقولك ده مات في ليبيا واللي يقولك الكمين كله مات واللي يقولك ياترى كان صح ولا غلط وناس كتير بتحاول تتفلسف ف استشهاد القائد اللى يومها شاف بوستاتى حيعرف قد ايه انا كنت مجنون و مقهور يومها و برد ازاي و ازاي اليوم ده كان فصيل مهم في حياتي غير وجهة نظرى و احترامي لناس كتير ... الله يرحمك يا قائد الله يرحمك يا بطل انا لو مخدتش من خدمتي غير اني سلمت عليك فده بالنسبالي كفاية. ولو الموت اختيار كنت اتمنى أموت شهيد جنبه و أروح معاه الـ ١٠٣".
أرملة الشهيد أحمد المنسى: أشعر بالفخر.. وعشت كل أحداث "الاختيار" فى الحقيقة
أعربت السيدة منار سليم، أرملة الشهيد أحمد المنسى، عن سعادتها الغارمة بمسلسل الاختيار بطولة الفنان أمير كرارة.
وقالت أرملة الشهيد أحمد المنسى، خلال مداخلة هاتفية فى برنامج "مساء dmc"، الذى تقدمه الإعلامية "إيمان الحصرى"، إن هناك الكثير من الأشخاص يقومون بالاتصال بها ويقولون لها إنهم يبكون أثناء مشاهدة مسلسل الاختيار، فكان ردها أنها عاشت كل هذه الأحداث فى الحقيقة، فهى تشاهد العمل بفرحة كبيرة، مشيرة إلى أن حمزة ابن الشهيد المنسى يبلغ حاليا من العمر 12 عامًا، وكان الشهيد يحكى له عن سيناء.
مؤكدة أن الشهيد المنسى تمنى الاستشهاد يوم استشهاد المجندين فى حادث رفح الأول، وأنه أوصى بألا يغسل ولا يكفن ودفن بملابسه العسكرية.
وتابعت منار، أنها حاليًا عندما تشاهد المسلسل يتبدل الحزن بفرح وفخر وعزة، وتستعيد المشاهد الحقيقية خلال مشاهدة العمل.
وواصلت منار، أن الفنان أمير كرارة قام بتجسيد حقيقة حياة الشهيد المنسى بشكل كبير، مشيرة إلى أن أفراد أسرتها يتابعون المسلسل أثناء العرض وكذلك أثناء إعادته.
من جانب آخر، قالت أرملة الشهيد أحمد المنسى، إن تجسيد شخصية أحمد المنسى شىء كبير وله تقدير خاص، وهو حلم بالنسبة لها وبالفعل تحقق، مشيرة إلى أن العمل الدرامى تعطل لعدة مرات وتمت إذاعته بعد ثلاث سنوات.
أٌقرا ايضًا:
شاهد.. الحلقة الأولى من مسلسل لعبة النسيان لـ دينا الشربيني
بث مباشر.. مسلسل النهاية الحلقة الثالثة بجودة عالية HD
تابعوا أخبار بلدنا اليوم على Google News
