تعليق ناري من طليق إيناس عز الدين بعد إدعاءها المرض

وجه المطرب أحمد قمر، رسالة مؤثرة لطليقته الفنانة إيناس عزالدين، بعد أزمتها الأخيرة.

وكتب أحمد قمر من خلال حسابه الشخصي على تطبيق "الفيسبوك": "اعذريني يا ايناس مش هقدر احافظ على كلمتي معاكي لحين التحقيق في الامر بشكل قانوني وافضل ساكت وشايف ظلم كبير واقع عليكي وتجاوزات في حقك انا لا يمكن اقبلها على انسانة عاشت في بيتي سنين ومش قادر حتى استنى لحد ما اتمالك اعصابي من اللي حاصل معاكي واقدر اطلع لايف اتكلم وهكتب البوست ده اولًا".

وقال أحمد:"هرد على جزئية شايف ايناس بتتدبح قدامي فيها هل النقابة حققت مع ايناس قبل ما يتقال انه هيتم شطبها بشكل نهائي من النقابة هو انتوا بتحاسبوا الناس قبل ما تحققوا معاهم ولا بقى التحقيق دلوقتي عن طريق السوشيال ميديا وانها لازم تطلع تتكلم في السوشيال ميديا وتبرر مش فيه اجرائات قانونية لازم تتبع ويتم استدعائها للتحقيق وهل يا ترى اتحاد الكرة حقق مع محمد مجدي لاعب الاسماعيلي اللي دخل المستشفى بنفس السبب وهو كان معاها على نفس الطيار اللي راجعة من المغرب وقاعد في نفس المحيط بتاعها ونزل صورته على انه كورونا برضوا لانه جتله نفس الاعراض خاصة ان فعلًا كان معاهم مصاب وحالته ايجابية في الطيارة واتأكدوا من ده لما رجعوا مصر هل صدفة هي ومحمد مجدي اللي على نفس الطيارة وفي نفس المحيط يحصل معاهم نفس الشيء".

وأكمل أحمد قمر حديثه قائلًا :"طيب بتقولوا انها بتكتب كل شوية وتدعي انها مريضة علشان تعمل شو وانا النقطة دي انا بقى اللي لازم ارد عليها لانها كانت في بيتي ايناس من قبل جوازي منها وهي كل شوية تقع من اهلها وتروح مستشفيات من صغرها ومناعتها سيئة واقل حاجة بتصيبها ايناس دخلت بيتي ومن اول شهر حصل حمل و كان في توأم فرحتي و فرحة اهلي واهلها كانت ما تتوصفش ولا تتقدر بثمن لحد ما وصلت للشهر الرابع وحست بتعب ومش عارفة فيها ايه روحنا كشفنا وعملنا سونار في مستشفى المركز الطبي في اسكندرية ولقينا ان الاجنة ميتين والنبض متوقف وان حالتها خطر وهتدخل في تسمم حمل والدكتورة ادتها حبوب تحت اللسان علشان تجهضها من غير ما توسع الرحم و فضلت ٢١ يوم قدامي بتتعذب لحد ما اجهضت ومسكت ولادي اللي لم يكتمل نموهم وكانوا حتت لحم ميتين بين ايديا قولت عمرهم وهي كانت بتموت قدامي وعمري ما انسى شكلها وهي ماسكة لحمها وبتبكي انه مات حتى لما دخلت اراب ايدل حصلها مشكلة و نزيف في الاحبال الصوتية والقناة نفسها اللي اعلنت الكلام ده وانها ممنوعة من الغناء ٢١ يوم ومن الكلام ٤ ايام و وقتها غنت وهي تعبانة هل هتكذبوا كان مذيعة وادارة قناة mbc اللي قالوا كده بعد منظار حنجرة ليها هما كمان كدابين".

وتابع أحمد :"المهم اللي يعرف ايناس عارف قد ايه هي بتاخد كل حاجة على اعصابها بشكل شديد جدًا وده كان بيأثر جامد على القولون لحد ظهرت معاها مشاكل المعدة والقولون واللي اتشخصت اكتر من مرة غلط واخدت ادوية كتير علط بوظت هرموناتها لحد ما زادت سوء وكنت بشوفها وهي بترجع دم قدامي و بتنزف من فتحة الشرج دم بالايام وانا وخالها وامها كنا نحتاس بيها وهي غرقانة دم في ايدينا انا اللي كنت بشيلها على كتفي وانا اللي كنت بمسح دمها وانا اللي كنت بشوفها وهي بتعاني كل شوية وتتشخص غلط وحملت في خلال المدة دي مرتين مرة الحمل نزل لوحده و مرة حالتها كانت حرجة و كانت هتدخل مننا في غيبوبة لان اعراض الحمل كانت بتقلب معاها بنزيف من الشرج من القولون و ترجيع دم وقطع نهائي للاكل وانا وخالها احتاسنا بيها في المستشفيات اللي كلهم اجمعوا ان الجنين لازم ينزل لانها مش هتتحمل لحد الولادة والكلام ده كله حصل في مستشفى القوات المسلحة في اسكندرية وبجواب من النقابة دخلت المستشفى وكانت حامل في الشهر التاني واخذنا وقتها تقرير من دكتور جهاز هضمي و دكتور تاني جراح وبناءًا على التقارير دي تم اجهاضها وكأنها بتتحرم غصب عنها من الامومة في عز شبابها رغم انها ما عندهاش مشاكل في الحمل نفسه لكن مشاكلها كلها في القولون وتمنع استمرار الحمل".

وأكمل :"لحد ما اتعمل مناظير معدة و قولون وتم التشخيص ان عندها فتاء في المعدة و ورم في القولون و اخدوا منه عينة وهي وقتها قالت انا ان عندها ورم ومستنية تعرف خبيث ولا حميد لحد ما ربنا من رحمته بيها طلع مجموعة التهابات شديدة على مدار سنوات اتجمعت على بعض وعملت كتلة كبيرة حميدة في القولون وكل يوم في المستشفى واغلب دخولها المستشفى والمناظير والتحاليل والاشعة اللي كانت بتعملها كانت بتكون من جوابات رسمية من النقابة بتاعتها ويقدروا يراجعوا الايصالات بتاعة تحويلها لمستشفى القوات المسلحة و معمل الفا ومعمل البرج وغيره وغيره وطبعًا الايصالات دي بتتحول للحسابات لانها عضو عامل في النقابة فأي ايصال بيطلع بتروح بيه المستشفى هي بتدفع ٢٥٪؜ من قيمة دخولها وعلاجها وحجزها او تحاليلها واشعتها ومناظيرها والنقابة بتدفع ٧٥٪؜ فأكيد كل الايصالات والحسابات دي موجودة بالنقابة".

وإختتم حديثه :"انا اسف يا ايناس وعارف وضع حالتك دلوقتي شكله ايه وقد ايه انتي لسه تعبانة وحالتك زي الزفت ومش متحملة بس مش هقدر اشوفك بيتقطع فيكي واسكت وانا جنبك ومعاكي انا واهلك لاننا حضرنا وشيلنا تعبك ومرضك سنين على كتافنا وهنفضل جنبك لحد ما يتم التحقيق رسمي وتقولي كل اللي عندك بشكل قانوني لان الكلام مافيش اسهل منه لكن اثبات الحقيقة هو ده اللي لازم يتعمل بالقانون، وربنا يعينك على اللي انتي فيه دلوقتي وعلى وضعك الصحي اللي زي الزفت ويعين كل انسان سبك وخاض فيكي وفي عرضك وفي اهلك الطيبين المحترمين على نفسه لانهم شياطين مش بشر وكل اللي كانوا بيمثلوا انهم اصحابك وبيحبوكي وطول الوقت جنبك ومعادنهم بانت في شدتك ولما وقعتي كله سن السكاكين ودبح فيكي .. وتتساقط الاقنعة".

وكان علق الدكتور خالد مجاهد المتحدث باسم وزارة الصحة، على ما قالته المطربة المصرية إيناس عز الدين، والتي ذكرت أنها مصابة بفيروس كورونا المستجد - كوفيد 19، بعد احتجازها في مستشفى حميات إمبابة.

وقال خالد مجاهد، خلال مداخلة هاتفية مع قناة تليفزيونية، إنه لم يتم حتى الآن التأكد من إصابة إيناس عز الدين، بـ فيروس كورونا، وأن حالتها الصحية مستقرة، لافتًا إلى أن نتيجة التحاليل لم تصدر بعد.

وقالت إيناس عز الدين "عندي رضا تام بكل اللي هيجيبوا ربنا بحب اطمنكم انا لساني عاجز عن الكلام بعد ما شفت رسائلكم ليا ساعات ربنا بيعرضنا لأزمة عشان يبين إن فى ناس بتحب الخير لبعض وتدعي لبعض بنيه صافية.

وأما عن المشككين فى مرضها وأنها اتخذت هذه الخطوة بداعى الشهرة، فقالت "مفيش حد يحب يتشهر ويطلع بالمنظر ده ويدعي علي نفسه إصابته بفيروس معدي ويخلي الناس تخاف تتعامل معاه"، وسعيدة بإبتلاء الله لى فهو يخلص من الذنوب في الدنيا وهذا حب من الله، وليست خائفة ومتأكدة من أن ستشفى وتعبر هذه المحنة".

أقرا ايضًا:

مالكيش دعوة بالمصريات.. هيدي كرم تهين سيدة عربية

بسبب كورونا ..شهيرة تناشد صناع الدراما : أوقفوا تصوير المسلسلات