انتشر عبر موقع التواصل الاجتماعي "فيس بوك"، منشور يفيد بتزييف النجم محمد رمضان لنسب المشاهدات الخاصة بمسلسله الرمضاني "نسر الصعيد"، عبر موقع الفيديوهات الشهير "يوتيوب"، زاعمين أن تلك النسب وهمية وفضحتها التكنولوجيا الحديثة.
وجاء في المنشور: "الشركة المنتجة لمسلسل محمد رمضان اللي بيتعرض حاليًا استخدمت طرق غير شرعية عشان توهم الجمهور والإعلام إن مسلسلهم "نسر الصعيد" هو رقم 1 في السوق، بس للأسف وقعوا في شر أعمالهم لأن التكنولوجيا متاحة للجميع، وفيه متخصصين يقدروا يعرفوا دة بسهولة".
وأضاف: "باختصار أي صناع مسلسل بيحاولوا يكسبوا من المنتج بتاعهم، بطرق كتير منها النشر على موقع يوتيوب العالمي، مقابل ده بيحققوا أرباح كبيرة لو المشاهدات ليهم حقيقية، بس لو الأدلة بتثبت إن جماهير محمد رمضان اللي خلوه رقم واحد وخلوه يوصف المنافسين بإنهم حمير وأغبياء، الجماهير دي "فيك" مش حقيقية أصلا".
وتابع المنشور: "بالمناسبة الموضوع دة مش جديد دا حصل فى امريكا من فترة وكانت فضيحة لما المدعي العام الامريكي إريك شنايدرمان اتهم شركة "ديفومي" بإنها بتبيع متابعين وهميين لمشاهير وشخصيات عامة، والقضاء أثبت تورط نجوم كبيرة في شراء متابعين وهميين، وطلعوا اعتذروا بعدها منهم ليدي جاجا وجاستن بيبر".
واستطرد: "القواعد المتعارف عليها فى موقع يوتيوب، بتقول إن عدد مشاهدات أي فيديو بتتناسب مع عدد التعليقات عليه، والنسبة تقريبا 6%، يعني كل 100 مشاهد 6 منهم بيسيبوا تعليق علي الفيديو، ودي احصائية عالمية، وباستخدام أداة vidiq لتحليل الحلقة الأولى من مسلسل نسر الصعيد هيبان لأي حد إن التفاعل عليها نسبته 1% يعني أكيد ملعوب فيه، مشاهدات الحلقة على اليوتيوب تجاوزت 9 مليون ونسبة التعليق 1% !!".
وتابع: "واللى بياكد التلاعب دا الاحصائية دي من موقع "kedoo" اللى بتبين إن الشركة المنتجة بتدفع فلوس فى أوقات معينة بتشترى بيها مشاهدين ومشتركين وهميين علشان كدا المعدل بيزيد فجأة فى وقت معين وبينزل فجأة فى نفس الوقت ودا لان المشاهدين من دول مختلفه، وكتير منهم من اجانب يعني مش بيعرفوا عربي أصلا، بيشوفوا الفيديو دقائق بسيطة، ودا لان طريقة فتح الفيديو بتكون "Pop UP" يعني الفيديو بيظهر فى نافذة منبثقة وأحيانا مخفية فى المتصفح، وللأسف النجم الأول مش هيقدر ينفي ده، لأن المشاهدات دي مش بتكمل دقائق معدودة من الحلقة، ولو حابب ينفي وينقذ سمعته ممكن يفتح حساب الشركة على موقع يوتيوب، ويوري لجمهوره جايب المشاهدات دي منين؟".
كان الفنانان أحمد السعدني وأمير طعيمة، انتقدا محمد رمضان بسبب جملة "لا عزاء للأغبياء"، وجملة "أنا نمبر 1"، التي اعتبراها إهانة لزملاء محمد رمضان المنافسين في الموسم الرمضاني، فقال أمير طعيمة: "في إهانة واضحة ومباشرة لكل من شارك في الموسم الرمضاني الحالي، تخيل الموسم ده شارك فيه عادل إمام ويحيي الفخراني، وغيرهم ممن سبقوه ومن هم من جيله ومنهم من يفوقوه في الموهبة وفي احترام زملائهم، وكمان مشغل أغنية بتقول إنه رقم واحد وكلام كتير لا يحمل أي احترام للمنافسين"، وطالب الفنانين بعدم المشاركة في أي أعمال مستقبلية مع محمد رمضان.
تابعوا أخبار بلدنا اليوم على Google News
