قال الكابتن ماهر همام، نجم النادي الأهلي السابق، إن مباراة الأهلي اليوم أمام فريق ستاد أبيدجان مباراة مصيرية لرغبة الأهلي في اعتلاء صدارة المجموعة.
وأكد "همام" في تصريحات خاصة لـ"بلدنا اليوم" أن الأهلي سيواجه أزمة كبيرة في حالة تعثره اليوم أمام الفريق الإيفواري، مشيرا إلى صعوبة الموقف فيما يخص مصير مارسيل كولر داخل الفريق في حالة الهزيمة.
ماهر همام: هذا هو تأثير الهزيمة على كولر
وتابع: "أكيد الأهلي لو خسر أي حاجة فيها تعطيل لمسيرة النادي في الدوري العام أو إفريقيا هتأثر بشكل كبير جدًا على موقف كولر في أنه يكمل المشوار".
وأوضح أن استراتيجية الأهلي بشكل عام تحتم على الإدارة توفير البديل بشكل فوري في حالة رحيل المدرب.
واستكمل: "مليون في المية ممكن يكون في بديل واتنين وتلاتة في أي وقت، لأن دي استراتيجية النادي".
وأشار إلى شعور جمهور الأهلي بحالة التذبذب في أداء ونتائج الفريق، وهو ما يقع على عاتق المدير الفني، معقبًا:" الأهلي هو النادي الوحيد اللي بيدي براح ووقت وزمن للمدير الفني لإثبات نفسه، لكن دا مبيشفعش للمدير الفني لأن الجماهير مبتسكتش، وجمهور الأهلي واخد على البطولات والمكسب وده حقه على الإدارة واللاعيبة".
وعن توقعاته للمباراة فنيًا، أضاف الكابتن ماهر همام لـ"بلدنا اليوم": "أنا أتمنى النتيجة تكون بنفس الضغط اللي بنلعب بيه وأن النتايج تتحسن خارج الملعب وداخل الملعب ويبقى في إصرار النهاردة على المكسب ودة بيبان من أول عشر دقايق أنت عايز إيه من الجيم".
ماهر همام: الأهلي أكبر من كدة
واستطرد قائلًا: "حتة إني أروح علشان أدافع واطلع بنقطة الكلام دة مش مع النادي الأهلي يا جماعة النادي أكبر من كدة، النهاردة حاجتين مطالبين مني وأنا معييش الكورة بنزل نص ملعبي وبأمن خطوطي التلاتة، وأنا معايا الكورة لازم أهاجم على الأقل بست سبع لاعيبة يبقى عندي نزعة هجومية ترابط الخطوط التلاتة ويبقي عندي زيادة عددية داخل الـ18، علشان أقدر أجيب جول مش كل مباراة نحس إن وسام لوحده يا جماعة لأ مينفعشي".
واختتم: "وسام عايز مساندة لاعيبة من تحت ومن حواليه الجناحين يبقوا قريبين منه كرأسين حربه واتنين اللي بيلعبوا تمانية يجوا يبقوا موجودين معاهم وطرف من الأطراف موجود فكده تحس أن عندك انتشار، إحساس الانتشار ده في التلت الهجومي بالعدد دة يديك إحساس أن أنت ممكن تقدر تجيب هدف لكن حتة أن الراجل لوحده وعمال ينادي على الناس مينفعش".
ماهر همام: المشكلة مش في المدرب لوحده
وقال همام: «في رأيي أن التلاتين لاعب أو الخمسة وعشرين لاعب اللي مع كولر هم من أفضل لاعيبة موجودين في الدوري المصري وأفضل اللعيبة الموجودين بأفريقيا.
وأضاف: «النهاردة التغيير أو الغيابات نتيجة الإصابات أو إيقاف المفروض البديل مبيقلش عن اللاعب الأساسي ودة دور اللعيبة من الناحية الفنية»
ولفت همام: «يعني مثلا مباراة النهاردة تلاتين في المية للراجل المدرب وسبعين في المية لللعيبة و أي مباراة دة بيبقي تقييمها تلاتين في المية للمدرب والسبعين في المية لللعيبة ليه لأن اللعيبة دورها في الملعب انها تنفذ اللي هم إشتغله عليه فا التنفيذ ساعات مبيطلعش زي ما هو بيطلع عشرين في المية تلاتين في المية ودة كلام غير منطقي».
و أوضح «أنا ضد أن الكلام كله للراجل للراجل للراجل المدرب هو الراجل بيلعب لوحده هو الراجل معاه سلاح وسلاحه هو اللعيبة واللعيبة مبتنفذش ليه
ليه دايما بنلوم علي المدير الفني والجهاز الفني وبنرمي الشماعة عليهم وبننسي اللعيبة ودور اللعيبة ما هي اللعيبة دي هي اللي بتنفذ فكر الراجل ده طب هي اللعيبة ليه مبتنفذش ايه المانع ايه اللي يمنع ان انت بإمكانيات النادي الأهلي اللي انت فيها جماهيريا ومعنويا ايه المانع انك تستمر في النجاحات الحته دي فيها علامة استفهام كبيرة جدا ناحية اللعيبة».
تابعوا أخبار بلدنا اليوم على Google News
