لفت أنظار الجميع، واستطاع جذب انتباه الجمهور منذ ظهوره في برنامج SNL بالعربي بسبب حسه الفكاهي، والكوميديا الكبيرة التي يتمتع بها، وشارك بعدها في العديد في الأعمال الدرامية والسينمائية .. فإليكم نص الحوار مع الفنان توني ماهر :
الفنان توني ماهر - تصوير : معاذ النجار
- كلمنا عن مشاركتك في مسلسل كنبة حبشي ؟
بطل المسلسل هو فكرة ومرتبطة بالكنبة ، والمسلسل تدور أحداثه في إطار كوميدي فانتازي ، والكنبة دي بتوصلنا لكذا عالم منفصل عن بعضه.
- ايه هي طبيعة دورك في المسلسل ؟
دوري شاب اسمه سيد كاكا ، وهو صاحب كريم عفيفي وإبرام سمير ، والكنبة في المسلسل بتاخدنا في كذا قصة مختلفة.
- ايه اللي شدك إنك تعمل الدور دة ؟
انا بحب جدا أعمل الأعمال اللي ممكن اعمل فيها أكتر من شخصية ، والمسلسل ده فيه كدة ، ولما يتعرض عليا حاجة زي كدة مكتوب حلو وفيه مخرج واعي مش بقدر أرفض الدور إطلاقا.
الفنان توني ماهر - تصوير : معاذ النجار
- بتحب دايما تشارك في الأفكار الغريبة واللي بتتميز بالفانتازيا ؟
انا بحب أوي الحاجات دي من أيام ما كنت بشتغل في برنامج Snl بالعربي ، ومن قبلها كمان الواحد دايما بيحب يخوض تجربة مختلفة.
-ليه مختفي عن السينما ومركز فقط مع التلفزيون ؟
أنا الحمد لله عندي 3 أفلام المفروض ينزلو الفترة الجاية ، فيلم مع الفنان خالد سليم اسمه "في القلب" وده تم تصويره من سنتين والمفروض هينزل الفترة الجاية ، وفيلم "عنب" مع إسلام إبراهيم و محمود الليثي ، وآخر حاجة انتهيت من تصويرها فيلم مع الفنانة هيفاء وهبي.
الفنان توني ماهر - تصوير : معاذ النجار
-بتحب تشتغل أكثر أفلام ولا مسلسلات ؟
أنا بحب أشتغل في المسلسلات لأنها بتوصل أسرع للجمهور من خلال البيوت ، وكمان الجمهور عرفني جدا من خلال مسلسلات زي مسلسل رحيم ، فوق السحاب، ونصيبي وقسمتك.
- فيه كيميا كبيرة جدا بينك وبين أبطال Snl لما بتشتغل معاهم في أي عمل ؟
طبعا إحنا أصحاب وزمايل من زمان وخريجين مركز الإبداع الفني من تحت إيد المخرج خالد جلال ، قعدنا مع بعض سبع سنين فالفترة دي كانت كفيلة يكون بينا كيميا في أي عمل نشتغله سوا .
الفنان توني ماهر - تصوير : معاذ النجار
- فيه شبه كبير بينك وبين الفنان محمد عز والناس بتتلغبط بينكم ؟
لحد النهاردة ناس بتتلغبط بيني وبين عز بسبب الشبه الكبيرة ، ويمكن لأننا أصحاب لفترة طويلة وقعدنا مع بعض سنين كتير.
- ايه اللي مفتقده بعد برنامج Snl بالعربي؟ وهل ممكن يرجع تاني ؟
فكرة إن البرنامج يرجع أو لأ مقترنة بصناع البرنامج نفسه الأستاذ طارق الجنايني والأستاذ أحمد الجنايني ، وأتمنى إن ده يحصل ، ومفتقد التجميعة بتاعتنا وإننا نتجمع مع نجوم مختلفة كل أسبوع ، وكنت بلعب في الحلقة الواحدة أكتر من دور أو شخصية.
الفنان توني ماهر - تصوير : معاذ النجار
- أكتر حلقة بتحبها في برنامج Snl كانت ايه ؟
أكثر حلقة مش ممكن أنساها كانت حلقة الفنانة منى زكي ، والنجمة يسرا.
- كلمنا عن شعورك بعد ما بقيت أب ؟
إحساس مختلف جدا بعد ما ربنا رزقني بابنتي "نور" ، وبكون حريص جدا في اختياراتي إني أعمل حاجة تكون فخورة بيها لما تشوفها وهي كبيرة.
تابعوا أخبار بلدنا اليوم على Google News
