طارق الدسوقي: "رفضت دخول أولادي الفن بالواسطة وأشرف فهمي كان هيضربني"

قال الفنان طارق الدسوقي، أنه رفض التوسط لأولاده لدخول الوسط الفني. 

وأضاف الدسوقي، خلال لقائه مع الإعلامية إنجي هشام، في برنامج "المنسي" المذاع عبر شاشة قناة "هي"رفضت أتوسط لأولادي علشان يدخلوا التمثيل، والفن مافيهوش واسطة، ولا يمكن تصنع نجم، والحكم للجمهور، وأحمد ابني مشي في الطريق بشكل صح، هو خريج كلية الإعلام، وبياخد ورش تمثيل، وأنا مبتدخلش إني أكلم له مخرج أو منتج، رغم أنه جان وفيه كل مواصفات النجم، ولكن سايبه يتعب زي ما أنا تعبت".

وتابع "أنا لو مش مقتنع برسالة الفن كنت أعلنت اعتزالي، ما أنا بعيد بقالي 10 سنين وخلاص الجاي مش قد اللي رايح، بس أنا لا يمكن أعمل كده، المهنة دي أنا قعدت 40 سنة فيها وعملت فيها رسالتي على أكمل وجه".

وعن كواليس تعاونه مع الفنانة شادية في فيلم "لا تسألني من أنا"  قال الدسوقي "الأستاذ المخرج أشرف فهمي كان هيضربني وكان عنده حق لأنه كان تصوير فينال وكان فيه كل الأبطال فوق السطح والدنيا برد جدًا، وأنا إتأخرت في الامتحان وقال لما يجي قولولي، وطبعًا مدام شادية لما جيت حجزت وقالت له لو لمسته أنا همشي الولد عنده امتحان هيعمل إيه".

مضيفا: "أنا شايف إن شادية مخدتش حقها، مفيش دور معملتهوش، كان المفروض النقاد يرصدوا تاريخها الفني، هي ممثلة عبقرية وعظيمة وهي مغنية كمان".