بيومي فؤاد عن تصريحاته في موسم الرياض "أنا قد كلامي عشان راجل"

علق الفنان بيومي فؤاد على تصريحاته التي أثارت الجدل بموسم الرياض بعد الأزمة مع الفنان محمد سلام.

قال "بيومي" على تصريحاته لأول مرة : "مش ندمان على كلامي وأنا قد كلامي عشان راجل واعتذر فقط عن حاجة واحدة أني قلت مش جاي اضحك وأنا جاي اضحك والضحك شيء جميل والكوميديا شيء صعب".

وتابع "أنا قلت إن إحنا مش بتوع فلوس،  وبعتذر عن ده لأن إحنا فعلا بتوع فلوس، أنا بشتغل وباخد فلوس،  ربنا يكفيكم شر شغل الكوميديان لما يقول إيفيه والجمهور ميضحكش".

وأضاف بيومي فؤاد، خلال حواره ببرنامج "حبر سري"، مع الاعلامية أسما ابراهيم، على قناة القاهرة والناس، أنهم يطلقون عليه في الخارج عمدة المصريين ويستشعر مسئولية، مضيفا: "لما بطلع بمسرحية بحس أني رئيس بعثة ومسئول عن الناس بتوعنا ولكنا اتشتمنا لما رحنا والحملة كانت شرسة على محمد أنور لأنه كان البديل ومكنتش بشوف الحاجات اللى على السوشيال ميديا ومحمد أنور كان بيبكي".

وتابع: "كنا بننزل وقت الفطار والغداء والعشاء نتعشى وهو مش معانا وكنا بنسابق الزمن وأنور كان بيعمل البروفات والأغانى والاستعراضات وعملنا بروفات يزيد عن شهر واحنا سفراء لبلدنا بيحبونا ويحترمونا ويقدرونا لو ده كايدكم أو غايظكم لكن دي حقيقة وهما بيحبونا وده غايظ اللي بيشتمنا ويدعي علينا ادعاءات والمفروض انه مثقف"، مؤكدا أن محمد أنور كان مكتئب جدا.